WILLEMSTAD.-  Pareha di e hòmber Edmar ‘Eto’ Clemencia   di fam de Meeza (27), ayera a ninga tur deklarashon dilanti hues komo testigu, despues ku e mes ta esun ku a bai polis i basha abou formal riba Clemencia.  Manera EXTRA a relatá den su edishon anterior, ayera e kaso di dòbel asesinato na Weto ku a tuma lugá dia 7 di aprel aña pasá, a keda tratá den pro forma, debí ku e akusado Clemencia no por a keda trasladá pa Kòrsou.

Durante tratamentu di e kaso di ayera, mama di e yunan di Clemencia a wòrdu skuchá komo testigu den sala di korte. El a wòrdu konfrontá ku su propio deklarashonnan, pero a ninga di ta esun ku el a duna nan na polis kontra tata di su yunan.

E otro akusado  Remyson Martina sospechá di ta esun ku a tira, tambe tabata presente bou di supervishon di e Tim Di Aresto.

Martina  ta enkarselá na Kòrsou, miéntras  Clemencia a keda  trasladá pa Hulanda pa su seguridat riba òrdu di Ministerio Públiko. Ayera meskos ku e bia anterior Clemencia a presentá via konferensia di video pa trata e kaso.

Clemencia ta keda akusá komo kómplise den e kaso di asesinato i esun ku a duna òrdu i  provoká asesinato di Ulrich De Pablo, despues ku su agresor a lòs vários tiru riba dje. Ministerio Públiko ta konsiderá e kaso komo unu pre meditá.

E di dos akusashon ta ku Martina lo a lòs bala tambe riba e víktima Shurijon Noor ku tambe a pèrdè su bida.

Martina ta keda akusá pa intento di asesinato riba Marlon Schoop i òf Ineke Balentina-Reinilia, riba e mesun dia.

Pareha di Clemencia ayera a keda skuchá den sala. El a hura ku e lo papia e bèrdat den nòmber di Dios. Hues na su turno a splik’é ku e no mag di gaña bou di huramentashon i si e hasi esaki tòg, e ta kometiendo perhurio ku tin un kastigu máksimo di 6 aña. El a bisa ku ayera mainta e tabatin komunikashon ku Clemencia promé e bin sala. E ta biba ku Clemencia i ta tata di su yunan.  E no tabatin niun kombersashon ku Clemencia kiko e lo bai papia durante tratamentu di e kaso.

Hues a kuminsá bisando na de Meeza,  ku dia 12  di mart aña pasá el a yama polis pa e hasi un denunsia kontra Clemencia.  Riba esaki de Meeza a bisa ku e no ta papia  nada. Hues na su turno a bis’e ku e no por dal buèlta atras i ku e ta obligá na papia. De Meeza mas aleu a duna di konosé ku tur loke el a deklará na polis ta mentira el a saka riba Edmar, pasó e tabata rabiá kuné. E tabata paden i no sa nada di tiroteo. Hues na su turno a bis’é ku el a wòrdu grabá pa polis ora ku e tabata hasi e denunsia. Segun e prosèsverbal, de Meeza a splika ku e ke un patruya bini pa motibu ku Clemencia a kaba di sefta su vehíkulo ku bala.

Mas aleu el a konta polis ku Clemencia ta na kabes di Army di Kura piedra. Riba e esaki de Meeza a duna di konosé ku ta gaña el a gaña ku el a sefta su vehíkulo ku bala. Hues a sigui relatá mas aleu ku polis a bai wak e vehíkulo, despues  ku de Meeza a yama.

Ora ku nan a yega nan a haña un Audi koló blanku ku perforashon di bala. Pero despues di esaki, Clemencia lo a yama hopi i pidi despensa i ku e lo no ke hasi denunsia mas. Riba esaki de Meeza a bisa ku Clemencia a pidi despensa di a sak’é fo’i kas.

Segun e deklarashon di Meeza mas aleu na polis ku tur kos a kuminsá na momento ku Clemencia a haña algun kombersashon ku e tabatin ku e víktima Uchi den su telefòn, kaminda nan ta mansa kurason pa otro i ku Uchi ta bis’é ku e ta su dushi.  El a bisa ku Eto ta un di e grandinan di Army i un di esnan ku ta duna òrdu.  El a bisa ku e ta dependé kompletamente di Eto tantu finansieramente komo pa tin un dak riba su kabes. E no mag di bai niun kaminda. Su mayornan no kere mas den kas i p’esei el a bai kas di su wela. De Meeza a ninga tur esakinan.

Hues na su turno a puntr’é dikon el a firma e ora ei, riba tur e papelnan di kual e duna komo kontesta ku polis a bis’é pa e firma si no e no por sali fo’i kaminda e ta.