WILLEMSTAD.- Teniendo kuenta ku promé ku reces di Pasku na Hulanda e diferente partidonan kier entregá nan akuerdo gubernamental, eks minister-presidente Eugene Rhuggenaath a skibi un karta habrí pa Hulanda tokante e situashon aktual na Kòrsou. E karta ta skibí den forma di un deseo di Pasku (‘Kerstwens’).

Rhuggenaath a publiká e karta riba sosial media. Den e karta e ta indiká:  ‘Despues di dos aña, den e pandemia di COVID, ainda nos pais Kòrsou ta den insertidumbre. Por mira un kresementu den e sektor di turismo, pero ainda nos no ta unda nos lo ke ta komo pais. E pronóstiko di 7% di IMF ainda no ta trese nos a nivel di ekonomia pre-covid.

Nos no ta úniko...

Mundu henter ta tumando pasonan pa lanta bèk riba pia. Ta sumamente importante pa tuma e oportunidatnan ku tin riba mesa i desaroyo nos pais pa asina hasi nos mes mas resiliente pa por fangu e klapnan.’ Mas aleu Rhuggenaath ta sigui, bisando ku nos ta un pais chikí, pero resiliente, ku personanan fuerte i  kreativo.

Rhuggenaath: ‘Nos balor komo pais, ta unu ku nos mester kultivá. Nos rekursonan natural i humano ta hasi Kòrsou un potensial den Karibe. No pa awe i mañan so pero pa nos futuro tambe.

Pa ta eksitoso i komo pais mas fuerte mester bin ku desaroyonan ku lo hiba Kòrsou dilanti. Nos tuma e chèns aki ku dos man i huntu traha na fortifikashon i resiliensia.’

Rhuggenaath den su karta ta referí na un karta fecha 25 mei 2021: “No laga e konseho di RvS di Reino ta un álibi pa bolbe kai den e patronchinan bieu dor di evitá responsabilidatnan (mutuo), keda será den nos propio outonomia i bolbe laga otro lòs.”

E tin komo konseho pa polítiko lokal i polítikonan na Hulanda ku: ‘Ban traha no solamente riba e reformanan ku mester wòrdu hasi, pero tambe riba e desaroyonan asina nesesario pa nos pais. Invershonnan den enseñansa, agrikultura i otro sektornan ekonómiko.’