WILLEMSTAD. - Deskonosínan a tira un ‘molotovcocktail’ den sede di PAR djasabra mardugá. Brantwer i polis tabata presente hopi lihé. E kandela no a kousa hopi daño.
Asina lider di partido PAR Eugene Rhuggenaath a splika djasabra mainta durante un rueda di prensa ku e partido a organisá pafó di sede na Fokkerweg.

Segun Rhuggenaath esaki ta un atake teroristiko. ‘Resientemente a daña diferente di nos billboard. Tambe a hòrta tres trailer ku propaganda di PAR. Na mi opinion esaki ta forma parti di un atake organisá kontra nos. Pero nos lo sigui ku kampaña. Nos lo sigui ku nos lucha pa bon gobernashon den e siguiente gobièrnu. Elekshon di 28 aprel awor ta mas importante ku nunka.’

Segun Rhuggenaath polis ta investigando e kaso aki. ‘Nos ta warda pa e konklushon. Nos ke gradisí polis I brantwer pa nan trabou.’ Durante djasabra mainta Rhuggenaath a haña diferente reakshon di sosten for di otro partidonan polítiko. ‘Den tur partido tin hende desente. Nos komo PAR lo keda bringa pa e desensia den polítiko pa un mihó Kòrsou.’