WILLEMSTAD.- FinTech ta referí na "e aplikashon di teknologia i inovashon pa hasi produkto- i servisionan finansiero mas efektivo i/òf mas aksesibel pa tur usuario".
Durante e evento aki, e invitadonan tabatin e oportunidat di sera konosí ku Curaçao Fintech Association su hunta di direktiva i su miembronan fundadó. Nan a haña informashon tokante kiko FinTech ta i a debatí riba e retonan i oportunidatnan den e sektor aki. Tambe nan a siña kon nan por benefisiá di e komunidat lokal di FinTech i kon nan por bira parti di dje.
E evento a wòrdu atendé pa representantenan di organisashonnan gubernamental, bankonan i otro institushonnan finansiero, komersiantenan i naturalmente, empresanan di FinTech.
E presidente di Curaçao Fintech Association (CFA), Geraume Bor, a duna inisio na e programa di e anochi ku un presentashon den kual el a splika elokuentemente e propósito di CFA i dikon FinTech ta asina importante pa e futuro di Kòrsou.
Sr. Cedric Pieters, di CBCS (Banko Sentral), a añadí ku  empresanan lokal di FinTech i e akshonistanan den nos pais su merkado finansiero lo mester uni forsa ku Curaçao Fintech Association, ya komo ku CFA lo por bira e organisashon ofisial ku ta representá e sektor i merkado pa Gobièrnu i Banko Sentral. Esaki lo por bira realidat mirando e desaroyonan den e sistemanan di pago, e infrastruktura, produktonan i solushonnan finansiero inovativo i e leinan ku lo bini pa ku e sektor aki na Kòrsou.
Sra. Priscilla Lotman, fundadó di UME Front Shore, a duna un diskurso inspirá tokante e kasonan di usa “fin”I “tech” den kual por a opservá e desaroyonan di finansa i teknologia den futuro. Un aserkamentu di uso ku e a presentá a pone tur hende presente sigui pensa ariba. E tabata un kaso den kual transferensia di balor ta bòltu ora un kliente duna informashon personal pa banko por kumpli ku su reglanan di ‘compliance’.
Sr. Luis Santine, un eksperto den FinTech i un co-fundadó di e empresa di FinTech lokal CX Pay, tambe a agregá: "Bankonan por benefisiá di un kolaborashon ku empresanan FinTech ku ta ofresé produktonan spesialisá ku ta mehorá e eksperensia di e kliente."
E tabata un evento hopi bon risibí ku a duna speransa pa mas kolaborashon den futuro; un chispa pa realisá e benefishinan di teknologia, inovashon i inklushon pa tur hende na Kòrsou. Inovashon!

Pa mas informashon tokante e Asosiashon di FinTech di Kòrsou (CFA) òf si bo ta interesá den bira miembro di e asosiashon aki, tuma kontakto ku Efia Scuotto-Luis na info@curfin.tech.