WILLEMSTAD.- ‘Nos tin ku tene kuenta ku hendenan ku tin malesa króniko. Nos sa di nos mes famia si tin hende ku tin suku òf problema ku kurason, si nan tin ku dialisá, si nan tin kanser òf haña tratamentu pa kanser. E grupo ei nos tin ku protehá’, asina dr. Izzy Gerstenbluth a bisa ayera durante konferensia di prensa di gobièrnu. ‘Esaki ta e grupo nos tin ku focus riba dje. Kòrda ku nos ta bisa: tene distansia, purba evitá grupo grandi riba otro. P’esei esaki ta e lugánan kaminda ta haña mas chèns pa plama e vírus si un òf dos persona tin e.’
Tambe Gerstenbluth a hasi un yamada na henter pueblo di Kòrsou: ‘Evitá ku e malesa ta yega serka hendenan ku no por tin hopi resistensia kontra di dje. Esta e grupo di hende grandi, hende ku tin un malesa króniko. Nan ta esunnan ku nos mester protehá. Si nos no por protehá nan, si esaki kuminsá sali fo’i man ta bira un preshon muchu fuerte riba nos sistema di salú. I e ora ei nos tin ku tuma otro medida lokual niun hende ke. Kier men: yuda i evitá ku e vírus ta plama bou di e gruponan vulnerabel.’ Gerstenbluth a bisa ku esaki ta keda e mensahe. ‘Pasobra si nos ke ku bida ta bira un tiki mas normal, nos tin ku kuida nos mes. I nos mester kuida nos hende grandi i nos hendenan ku tin malesa króniko.’
Relashoná ku e 51 kasonan nobo ku a bira konosí djárason último Gerstenbluth a bisa ‘ku ta importante pa wak si no tin hopi hende ku malesa króniko ku a bira malu. Tambe ta importante pa wak e edat di e hendenan ku ta wòrdu infektá.’
Di e 51 kasonan ku a tèst positivo djárason, 5 ta 65 aña òf mas grandi. E 33 ku a tèst djaweps 2 di nan ta 65 aña òf mas tantu. Di e 314 kasonan aktivo ku Kòrsou ta konosé, 8,9 porshento tin 65 aña òf mas, asina Gerstenbluth a duna di konosé.
‘E kantidat apsoluto te ainda ta algu ku nos por kontené. Pero e ta keda algu ku nos tin ku wak.’
Relashoná ku e grupo di 51 hende ku djárason a tèst positivo, Gerstenbluth a bisa: ‘Nos ta mira diferente klùsternan di famia. Nan tabatin kontakto den famia ku un hende ku ta positivo. I bo ta mira henter famianan ta bira positivo. I si bo tin un par di eseinan, e kantidat di hende positivo ta subi hopi.’