WILLEMSTAD.- Sea nos bisa esaki na kuminsamentu òf nos bis’é na final, e lo keda meskos: Guiseppe Bonafastia tabata un kolega ehemplar! Ayera mainta nos dje famia di EXTRA a risibí e tristu notisia ku Guiseppe a bai laga nos di forma repentino. Durante su 15 añanan di servisio na EXTRA Guiseppe a  ehersé trabounan meritorio primeramente den notisianan lokal general, despues tambe enkargá ku farándula, i den e último fase di su karera el a fungi komo redaktor deportivo.

Nos no tin palabra pa ekspresá e pèrdida aki, ya ku un persona ku bo ta traha djaserka kuné durante 15 aña tin biaha ta mas ku un famia. I na EXTRA sin duda e definishon ei ta kuadra serka nos.

Tur hende ku a yega di konosé Guiseppe (57) den bida privá, den su bario di Mundu Nobo, riba tereno deportivo komo kiper i komo partisipante den diferente festival di kanto lo koinsidí ku e tabata un persona trankil, semper alegre, sosial, positivo. Un persona ku tabatin hopi apresio pa su yunan i hopi stimashon pa su mama. Den kualke kòmbersashon e tabata gusta hasi e remarke: “Mi mama dushi!”

Pero nos lo bai sinti su falta sin duda. I manera kada un di nos na EXTRA sa yam’é, Guisépe, Guis, Guissy, Guiseppo, Gestapo, tabata un plaser di tabatin bo komo kolega! Di parti di Staf i Personal di EXTRA ta bai palabranan di kondolensia na su mama, yunan i demas famianan, i ku nan lo tin e forsa pa karga ku e pèrdida.

Guiseppe, bo tabata un kolega ehemplar, i tabata un plaser!