WILLEMSTAD.-  Ounke un poko chikí EXTRA a selebrá su 45 aña ku su personal i tambe nos lektornan. Teniendo na kuenta e reglanan COVID-19, nos a sòru pa un bríndis pa trahadónan mèrdia i tur kliente ku a pasa EXTRA ayera a haña salú ku bolo.

I nos a haña bishita di algun di nos bon amigunan. Maduro & Curiel’s Bank, Guardian Group i minister Zita Jesus-Leito a traha tiki tempu pa pasa i felisitá nos. Tambe nos a haña hopi atenshon pa medio di yamadanan di telefòn, riba media sosial i nos sa ku hopi kier a bishitá nos pa duna pabien personalmente, pero teniendo na kuenta e reglanan di e pandemia aktual, nan a keda leu den presensia pero sigur serka den nos kurason.

EXTRA ta gradesí un i tur ku a pone atenshon na nos selebrashon di 45 aña i nos ta sigurá nan ku por kontra riba nos hopi aña mas. Danki.