WILLEMSTAD.- Djabièrnè último durante un fiesta ku tabatin na WTC, a surgi un kaso serio di agreshon.

Un i tur por a sigui riba ret di Facebook, kon un hòmber tabata agredí su víktima malamente.

Tabatin asta vershon ku e víktima a fayesé, a konsekuensia di e slanan ku el a risibí, pero esaki a resultá di no tabata bèrdat.

Nos di EXTRA tabatin un kombersashon eksklusivo ku e víktima mes, pa sa kiko presis a pasa, mirando ku tin vários vershon ta sirkulando rònt.

Ta trata di N.B. di  31 aña ku aworakí ta interná den Sehos, pa asina haña tratamentu médiko mas avansá.

Su kondishon ta stabil pero ainda tin basta doló na su kara, kachete i su kabes.

El a splika nos, ku e dia ei e no tabata pa bai fiesta mes, pasó e no ta un gai di fiesta.

Apénas e sa sali kas i ta preferá di ta mas tantu den seno familiar i huntu ku su yunan.

Un amigu di dje ku a bin fo’i Ulanda a bis’é pa nan lora e fiesta un ratu, mirando ku tabata un fiesta ku a hala basta atenshon. El a disidí di komplas’é su amigu i bai e fiesta.

Den e lugá dibertiendo un ratu, el a disidí di bai baño pa asina hasi su nesesidat. E ora ei tabata den algu pasá di 3’or di mardugá pa kue 4’or.

El a konta ku e tabata pará ta warda su turno, ora dado momento un grupo di hòmber a kana drenta i bisa ku nan tin ku bai wc promé ku tur hende.

Segun e víktima, el a haña esaki inhustu i a bisa un di e miembronan di e grupo ku no por i ku e ta bai promé ku nan, pasó nan a bin haña  tur hende  pará den rei.

Aki a surgi un interkambio di palabra entre e víktima i un di e miembronan di e grupo.

Segun e víktima dado momento, esun ku e tabata den diskushon kuné, a tira man riba dje pa dal e.

El a bisa ku  e no a tum’é i a tira moketa bèk ku a alkansá e hòmber den su kara.

Aki miembronan di seguridat a kore yega pa sa kiko ta pasando.

Segun e víktima mas aleu, na momento ku el a bira su lomba, su agresor ku ta un otro hòmber, a bini di atras  dal e moketa.

Esaki a pone ku el a kai i dal su kabes den pochi wc i pèrdè konosementu.

El a sigui bisa ku nan a sigui agredié fuera di su konosementu den su kara i trapa spesífikamente riba su kabes.

E ta pensa ku esaki pa motibu ku el a dal esun ku den kara i nan kier a saka sla bèk di e forma ei.

Reshèrshinan a presentá na hospital, di kual e víktima a hasi denunsia ofisialmente.

Polis ta hasi un yamada pa e agresor ku ya ta konosí pa nan entregá su mes mas pronto ku ta posibel.