WILLEMSTAD.- E malesa di Coronavirus ta afektando mundu kompleto. Lokalmente nos tin nos propio ekspertonan ku ta suministrá informashon riba e desaroyonan tantu internashonal komo lokal.

Kiko mas mihó si nos tende di un virólogo, den e kaso aki Dr. Byron Martina, un yu di Kòrsou ku ta hopi vèrsá riba e tereno aki. Dr. Martina ta ko-fundadó di “Curaçao Biomedical & Health Research Institute”, i e ta enkabesá e departamento di virologia.

E ta spesialisá den vírusnan eksótiko, Hanta, Dengue, West Nile, Chikungunya, Corona, Influenza, djis pa menshoná un par.

Un tim spesial di redakshon di EXTRA lo bai tin un entrevista “live” (bibu) for di Hulanda ku dr. Martina, partikularmente riba Coronavirus, su konsekuensianan i su komportashon.

Un invitashon ta bai na tur siguidónan di EXTRA pa sigui e entrevista aki riba nos página di Facebook mayan djadumingu 15 di mart for di 13:30 di mèrdia. Lo tin oportunidat pa hasi pregunta tambe na dr. Martina.