WILLEMSTAD.- Den kurso di fin di siman pasá i henter wikènt ta basta difamashon a tuma lugá riba Facebook kontra di EXTRA. Esaki nos no ta aseptá mas!

Pa esnan ku no a mira e komentarionan riba Facebook: segun algun persona den nos komunidat EXTRA ta un korant negativo ku kada dia ta pone kosnan negativo riba nan frontpage I asina hinka kosnan negativo den kabesnan di pueblo di Kòrsou. Esaki ta un mentira puru. EXTRA ta un korant ku ta duna notisia ophetivo, ku kurason pa komunidat di Kòrsou

EXTRA ta un korant ku ta para semper habrí pa nos portadanan positivo. I esaki semper a diferensiá nos sistema di funshoná i publiká. Nos por menshoná ku for di 26 di sèptèmber te ku e fecha di 12 di òktober siman pasá, 14 publikashon di EXTRA kaminda na un okashon tabatin un kran kimá riba nos portada i dia 5 di òktober un foto di e esena di krímen di e komersiante na Roi Santu kaminda e víktima sigur no tabata ariba.

E otro dianan nos tabatin fotonan positivo pa Kòrsou entre nan; firmamentu di adendum ku GZE,  inisio di trabounan pa drecha infrastruktura di Nieuw Nederland, muchanan huntu ku ministernan na inisio trabounan pa alsa seguridat rondó di skolnan, kachó reskatá pa brantwer, un bista di Mega pir 2, un bista di hotèl nobo ku lo bin na Punda i sin lubidá ku praktikamente tur dia deporte tambe riba nos portada.

Esaki ta djis pa menshoná último 3 siman kua ta e tipo di publikashonnan ku EXTRA tabatin komo kara di e korant.

Pero apesar di esaki, ku ki meta nos no sa, a disidí di hiba un kampaña di difamashon kontra di EXTRA riba Facebook, di personanan ku mester sa mihó entre nan asta un parlamentario ku a ‘post’ un mentira riba su “wall”.

Un mentira di un publikashon komparando un korant di deporte di Merka di djaweps 12 di òktober ku korant na Kòrsou di djabièrnè 13 di òktober. Dikon no a kompar'é manera mester ta esta korant di 12 na Kòrsou ku korant di 12 di Merka. Puru difamashon!

EXTRA ya a tuma konsehonan hurídiko i nos lo no aseptá e tipo di difamashonnan aki mas. Publikashon riba Facebook ta keda responsabilidat di esun ku publik’é sin mas. Korte tabatin diferente kaso den pasado di publikashonnan riba Facebook entre otro e aña aki di difamashon.

E sentensia di korte tabata ku e persona ei mester a rektifiká e informashon difamatorio i ‘Tag’ e hendenan dia el a pone e informashon riba su Facebook.

No ta promé biaha nos ta topa riba Facebook e tipo di mentiranan difamatorio aki pero nos lo no asept’é mas.

EXTRA ta habrí pa tur krítika pasobra di kada krítika nos ta sigui mehorá nos produkto pero no ku mentira, ku ta hasi daño na e korant.

I nos korantnan ta riba website (www.extra-v2.mystagingwebsite.com) pa tur hende por komprobá pa nan mes ku ya ta hopi aña kaba ku portadanan ku sanger i negativismo a pasa pa historia.