WILLEMSTAD.- Den kuadro di 40 aña di eksistensia, EXTRA por mira bèk den 2016 riba vários proyekto positivo pa no solamente e korant, pero tambe pa e komunidat ku e empresa ta forma parti di dje. Vários ta e instansianan deportivo, karikativo i sosial ku a risibí di un forma òf otro kontribushon di e korant number 1 di Kòrsou.

EXTRA no a lubidá tampoko riba su lektornan repartiendo mas ku 55 mil florin den 2016 na ganadornan di premio “Gana ku Extra”. Ademas a lansa e proyekto di ‘rebranding’ ku logo nobo i renobashon total di wèpsait www.extra-v2.mystagingwebsite.com. Awor tambe ku presensia riba media sosial ku no solamente teksto pero tambe imágennan di video. Pero mas ku tur kos un di e logronan ku sin duda ku

EXTRA ta orguyoso di dje ta e fondo di penshun pa su propio empleadonan.    Tabata e empresa Optimum Pension Management, ku Christof Curiel hasiendo un tremendo labor  ku hopi energia i amor pa konkretisá e logro aki.

EXTRA ya tabatin un fondo di spar pa su empleadonan pa hopi aña kaba pero e penshun aki ta trese hopi mas benefisio. Manera ku EXTRA a aserká sr. Curiel ku e petishon pa studia e posibilidat pa un penshun adaptá pa empleadonan, el a tuma e reto i pusha duru pa konkretis’é.  A hasi un eskoho for di e vários proveedornan unda a tene kuenta pa tene e gastunan mas abou posibel di e plan di penshun, e bentahanan fiskal, fleksibilidat i garantia riba e interes ku e empleadonan ta risibí riba nan prima di penshun.

Optimum Pension Management ta hasi hopi trabou di plan di penshun kolektivo pero tambe ta sòru pa atministrashon propio di plan di penshun pa direktornan akshonista mayoritario.

E ofisina di Optimum Pension Management ta keda manehá pa Peter Voorbergen i Christof Curiel.