Si medionan di komunikashon mundialmente ta pasando momentunan difísil, no ta un sekreto. No ta awor pero ta pa basta aña kaba e preshon riba prensa, enpartikular prensa imprimí ta grandi. Paisnan grandi manera Ulanda i Merka ta ehèmpel klave den esaki. Tur esaki a pone ku pa basta ratu kaba tin spekulashon di un media na Kòrsou ku lo sera su portanan. I siman pasá e spada di Damocles a kai riba nos koleganan di Nobo. Kada korant ku stòp di eksistí ta hasi nos tambe doló i ta un sla duru pa nos sektor. Nos ta kombibí ku nos koleganan ku a pèrdè trabou. NOBO meskos ku Radio Curom aña pasá ta institutonan klave den media na Kòrsou, pa hopi aña. Den último añanan por a mira vários otro medio di komunikashon tambe disparsé i vários pasando den tempunan difísil. Nos por grita ku digital ta remplasá e media imprimí i ku por haña tur notisia riba medionan sosial i grátis. E ta mas fásil pensa ku hasi, ya ku e velosidat di e notisia ku pa nos ta importante ta kosta. E ta kosta den forma di ekipo i trahadó pa bo por hasié manera mester ta, mas tantu posibel. Dunando e notisia grátis sigur no ta logr’e pero si ta sòru ku e por bira un “free for all” ku tur por bisa loke nan ke i e bèrdat (fake news) a keda kologá mei mei. E sosten di kumpra e korant òf pone bo propaganda ta sumamente importante pa sobrebibensia di e medionan. I den esaki nos ta kana yega na e peliger di krea un desierto di notisia. E korant ta instrumental den duna notisia lokal na nos pueblo. Ta korantnan tin e redakshonnan mas grandi i ta fuente di notisia pa hopi otro medio aki na Kòrsou.

Awor ku otro media mas ta disparsé ta un bon momentu pa para ketu i evaluá e realidat. Notisia ophetivo i ku kredibilidat ta importante pa kualke komunidat. EXTRA a sigui inová i sigur ta un di e medionan mas fuerte riba plataforma digital i sosial. I komo medio responsabel den nos informashonnan, tambe nos ta responsabel den nos obligashonnan mas aleu ku ta nos pagonan na proveedónan i pago di primanan sosial i impuesto.

I miéntras tantu, apesar di e turbulensia i e doló di mira otro korant sera su porta, nos ta sigui invertí pa kumpli ku inovashon. Pero djis tene na kuenta ku nos tin un grupo grandi di trahadó ku diariamente ta sali nan kas pa presentá e notisia kompleto na nos públiko. Nos tin di kumpli ku nan i sigur no por ferwaktu ku e notisia ta grátis. Esaki ta e realidat no pa nos so komo un empresa lokal, pero e ta konta pa tur otro empresa lokal, ku su pueblo tin di sostené sino e por bien dobla warda!