WILLEMSTAD.- Mas ekstenso i mas profundo di lokual EXTRA a bin ta hasi kaba e último añanan. Esei ta lokual EXTRA ta primintí nos lektornan relashoná ku kobertura di kada moveshon di nos selekshon nashonal di futbòl ku e luna’kí lo hunga dos wega di preparashon na Australia.

Nos reportero di deporte Carl Ruiter ta huntu ku selekshon nashonal na Australia di manera ku EXTRA lo tin un kobertura kompleto den korant komo tambe riba Extra Digital.

Djabierne 27 di mart Kòrsou lo enfrentá selekshon di China miéntras ku djamars 31 lo tin wega kontra di Australia mes na Melbourne.

Biahe pa Australia: E aventura a kuminsá pa sigui  nos selekshon nashonal

WILLEMSTAD – E biahe largu pero emoshonante pa sigui nos selekshon nashonal na Australia, a kuminsá ofisialmente. Un ruta largu ku destinashon final pa Sydney,Australia, kaminda lo tei pa kubri e weganan amistoso importante di selekshon si Kòrsou.

E promé etapa di e biahe a hiba Carl Ruiter di Extra for di Kòrsou pa Bogotá. Despues a sigui Santiago de Chile. Te ainda, tur kos a kana segun plan sin kontratiempo. Awor  ta prepará pa e parti mas largu di e biahe, e buelo interkontinental for di Santiago rumbo pa Sydney.

E mishon di e biahe aki ta pa trese kobertura kompletu di e preparashon, i weganan di Kòrsou su selekshon nashonal. Pa asina por tene komunidat di Kòrsou bon informá tokante tur desaroyo di su selekshon, ku ta na otro banda di mundu.

Keda pendiente pa mas informashon direktamente for di Australia.