EXTRA ta ranka sali asina aki ku nos super mega kampaña pa selebrá 50 aña.
Dia 1e di mart 2026, otro aña, nos ta selebrá 50 aña i pa nos kana yega einan, EXTRA ta kuminsá ku su kampaña, kaminda nos ta regalá premionan na balor di mas di 50 mil florin.
Manera nos lektornan i tambe nos Extra-videntenan a kustumbrá ku nos durante di kasi 50 aña, selebrashon òf no, semper por konta ku nos kampañanan di gana plaka.
For di nasementu di EXTRA kasi 50 aña pasá, nos tin Pensagana. Un kampaña ku nos ta regalá hopi plaka i ku semper ta kuminsá den e temporada akí.
Tambe nos tin e kampaña di wega di number, kaminda yenando e kupòn ku e number ganadó di dia i gana plaka. E premio aki ta yega un máksimo di 5 mil florin i no ta baha miéntras no gan’é.
I ku bista riba nos selebrashon di 5 lustro, 50 aña dia 1e di mart 2026, EXTRA ta kuminsá ku su kampaña estilo di Pensagana, pero muchu mas grandi. Nos ta yam’é e Super Mega Kampaña pa selebrá 50 aña EXTRA.
For di otro siman e páginanan ku kupòn pa yena lo sali. Pero for di e siman aki nos lo duna un ‘sneak peek’ di e premionan.
Ta hopi premio tin, for di
televishon,
frishidèr,
wasmashin,
stof,
‘airfryer’,
sèt di sala,
sèt di komedor,
telefòn,
bòn di gasolin,
‘tour’ pa kore keiru riba buggy,
Funmiles,
‘Daypass’ pa un hotèl di luho,
pasashi ku estadia
i hopi premio mas.
I e premio prinsipal ta un outo.
Un total di 50 premio nos lo repartí den e kampaña akí na un balor di mas di 50 mil florin.
Kon pa partisipá
Tur siman EXTRA lo saka den nos páginanan sentral un pregunta. Por haña kontesta di e pregunta akí den EXTRA mes algun dia promé. Nos lo tin relatonan di historia di EXTRA, deklarashonnan di fundadónan (QEPD) di EXTRA, deklarashon di empresarionan konosí, èks polítikonan i asina nos lo kana yega awe. Asina no solamente lesando bo ta sa mas di EXTRA pero tambe ta haña e kontesta di e preguntanan.
Meskos ku ta hasi ku PensaGana, dobla e página kompleto i pon’é den ènvelòp i tres’é na ofisina di EXTRA, Rector Zwijssenstraat 24 na Mundu Nobo. Nos kier kòrda tur lektor/pueblo di Kòrsou kompleto ku mester yena e formulario kompleto i skibi e kontesta kla.
E kampaña aki lo dura di te e último siman di febrüari, pa asina por saka e ganadónan riba djadumingu 1e di mart, riba dia di nos kumpleaño.
Klientenan ‘Online’
Nos klientenan di EXTRA digital tambe por partisipá. Nan mester prent e página meimei, yena esaki i mand’é na info@extra.cw. Nos mes lo prent e página pa nan aki i pon’é den ènvelòp. Esaki ta un servisio ku EXTRA ta duna e fiel lektornan den eksterior. Esnan ku ta aboná ‘online’ i ta biba na Kòrsou por pone nan página den ènvelòp i tres’é na EXTRA. Kòrda yena e nòmber di e abonado i no otro nòmber. Ke men si nos lektornan digital ta sea na Ulanda òf otro parti di mundu, nan tambe por partisipá i na final si suerte ta ku nan i nan sali den e premionan, nan por outorisá un persona pa tuma nan premio.
Tur esaki nos ta logra danki na un kantidat di komersiante ku ta djòin nos den e kampaña. Danki na nan sigur pa hasié posibel.
I asina ki EXTRA ta kuminsá ku su Super Mega Kampaña ku 50 aña ku premionan na balor di 50 mil florin.
Laga un komentario