WILLEMSTAD.- EY Dutch Caribbean no ta di akuerdo ku desishon di Fair Trade Authority Curaçao (FTAC) pa duna but. Segun FTAC na kuminsamentu di aña 2019 EY Dutch Caribbean a tuma over KDC Interim - ku ta e nòmber komersial di tur akountent i konseheronan di ántes KPMG Dutch Caribbean. Segun FTAC EY Dutch Caribbean no a hasi notifikashon di esaki. Esaki ta obligatorio.
Segun EY Dutch Caribbean tabatin kombersashon tokante un tumamentu over, pero esaki nunka a tuma lugá. Komo konsekuensia EY Dutch Caribbean no ta di akuerdo ku e konklushon i e but di FTAC. I komo konsekuensia nan lo apelá kontra desishon di FTAC pa duna un but di 400.000 Naf.
Den un komunikado di prensa EY Dutch Caribbean ta splika ku den añanan 2018 i 2019 nan a deliberá tokante un posibel tumamentu over di KDC Interim. Esaki tabata konsekuensia di desishon di KPMG International pa stòp ku tur su aktividatnan fin di aña 2018. Pero den aña 2019 EY Dutch Caribbean a disidí pa no tuma over KDC. Nan a manda un karta na KDC pa informá e kompania ofisialmente tokante nan desishon.
Manera ta konosí Fair Trade Authority Curaçao ta e outoridat independiente di kompetensia di Kòrsou. E ta para pa kompetensia liber i sin limitashon. FTAC te ainda nunka a duna but na un kompania ku no a duna notifikashon di konsentrashon.