WILLEMSTAD/KRALENDIJK – Kompania di aviashon EZ Air dentro di poko ta bai añadí avionnan mas grandi na su flota eksistente di dos avion Beechcraft di 19 stul i un Britten-Norman Islander ku 9 stul. E avionnan mas grandi mester bin reforsá e flota medio 2021. Ta trata di dos avion di e tipo Saab 340. Ta trata di avionnan di dos motor turboprop, diseñá i produsí pa e kompanianan sueko Saab AB i Fairchild Aircraft. Nan tin un kapasidat di 30 pa 36 asiento. E ekspanshon ku e dos avionnan mas grandi ta bin despues di un análisis kouteloso di tantu e flota aktual, komo di e avionnan nobo ku ta bai agregá.

Momentu pekuliar

“Kisas e momentu ta parse pekuliar pa traha riba ekspanshon, pero en realidat nos tabata trahando riba esaki kaba, promé ku e krísis di Covid-19 a kue nos di sorpresa”, CEO Rene Winkel ta bisa. Ounke e sirkunstansianan den e aña ku a transkurí a kambia drástiko, e kompania aéreo ta mira sufisiente oportunidat den e merkado aktual.

Winkel ta bisa ku e dos avionnan tipo Beechcraft a proba nan mes e último dos añanan i a hasi un trabou magnífiko. “Na mes momento nos ta ripará ku e avionnan tòg tin relativamente poko stul pa sierto ruta ku nos kier bula. Banda di esei, na e momentunan akí regularmente ta sosodé, partikularmente riba e ruta entre Boneiru i Sint Eustatius, ku ekipahe mester keda atras, pa motibu ku no tin sufisiente espasio. Nos kier trese kambio den esaki, pa motibu ku e no ta agradabel ni pa nos ni pa e pasaheronan”.

Personal di kabina

Agregashon di e avionnan nobo ta brinda tambe posibilidat pa sirbi mas destinashon den region. Ounke awor EZ Air ta kuminsá ku agregá dos avion, tin un di tres aparato tambe ya kla pará pa si ta nesesario sigui reforsá e flota. “I si ta nesesario tin un di kuater òf di sinku”, Winkel ta bisa. E ret di ruta di EZ Air, despues di agregashon di e aparatonan nobo, si tur kos kana segun plan, lo konsistí di mas òf ménos 10 destinashon regional.

Un kambio grandi pa EZ Air, pero tambe pa e pasaheronan, ta ku e avionnan nobo lo tin personal di kabina na bordo. “Avion ku tin entre 20 i 50 stul mester tin en todo kaso 1 steward òf stewardess na bordo en bista di seguridat di buelo”, direktor komersial Sueyenne Dammerman ta bisa, ku den pasado a traha tambe komo stewardess serka entre otro Air Aruba. Dammerman mes lo ta responsabel tambe pa rekrutashon i formashon di e personal di kabina nobo. Presensia di personal di kabina ta hasi posibel tambe pa parti snèk i bebida na pasaheronan riba buelonan mas largu.

PCN

EZ Air e último añanan a invertí sumanan kuantioso den entre otro sistemanan operashonal nobo, entre nan un sistema di reservashon nobo, un sistema pa check-in online i un módulo pa operashonnan di karga. Entretantu EZ Air ta transportá banda di pasahero, un kantidat konsiderabel di karga tambe.

E finansiadó mas importante di EZ ta Pensioenfonds Caribisch Nederland (PCN), ku via e kompania di invershon PMCN a fia EZ Air plaka pa start e aktual operashon. Dirigentenan di PMCN, Walter Blijleven i Bharat Bhojwani, ta bisa ku ta manehá e finansiamentu na satisfakshon, asta den e tempu difísil di Corona. “Ta un milager chikitu”, Blijleven ta bisa. “EZ Air tòg a haña un manera pa pa sigui mantené benta, no opstante ku vuelonan regular a kai afó, ku vuelonan di charter i di karga”. PMCN ta hopi di aserka metí den e konsulta tokante ampliashon ku e avionnan nobo.