WILLEMSTAD.- E kompania di aviashon EZ Air a kuminsá ku su buelonan entre Kòrsou i Boneiru awe. Resientemente e direktor i propietario Rene Winkel a risibí e dokumentunan konserní for di man di Zita Jesus-Leito, Minister di Desaroyo Urbano, Tráfiko i Transporte.

EZ Air ta un kompania ku a keda fundá na 2000. E no tabata konosí komo kompania di aviashon ku ta transportá pasahero. Mas bien e tabata realisá buelonan komo ‘air-ambulance’. E merkado tabata pidi un kompania mas di aviashon ku por brinda e servisio konfiabel entre e islanan Aruba, Boneiru i Kòrsou.

Boneiru ta e base di e kompania EZ Air i awendia komo BES e kompania a logra haña finansiamentu di e fondo di penshun di BES, Pensioenfonds Caribisch Nederland. Di e forma ei a buska mihó avionnan pa sirbi e tráfiko entre e islanan.

Minister Jesus-Leito a mustra un enorme satisfakshon pa e echo ku un kompania di aviashon mas lo bai brinda servisio entre e islanan di eks Antia. Bon bini i éksito di parti di EXTRA na EZ Air.