Dr. Matroos ta bon bon di salú

WILLEMSTAD.-Esaki ta e sikiatra dr. Glenn Matroos, den bon estado di salú i na su ofisina trahando trankil awe djaluna 12 di aprel 2021. EXTRA tambe a tuma nota ayera di informashon ku tabata sirkulá pa indiká ku e profeshonal aki a fayesé debí na Covid. Asta a pone aserka ku a ofresé e bakuna, pero e lo a rechas’e debí ku e lo ta kere den medisina alternativo esta natural. 'Fake news' i nada otro.

Ta hopi tristu ku den e komunidat aki mas i mas ta kopia mal kustumber i mala maña di otro partinan i praktiká eseinan aki. Covid ta kobrando basta bida na Kòrsou tambe, danki dios no na mes kantidat ku ta e kaso na Aruba, Hulanda, Merka, Brasil i hopi otro pais.

Dr. Glenn Matroos ta ‘bibitu’ ku otro palabra bon bon. El a tuma bakuna for di e momentu ku el a haña e oportunidat i e tei pa sigui sirbi tur su pashèntnan normal.

Lamentabel, hopi lamentabel ku hende por pensa pa skibi i despues plama un informashon asina. 'Fake news' semper ta robes, pero fake news pa bisa ku hende a muri ta hopi tristu!