WILLEMSTAD.  E informashon  ku EXTRA a publiká ayera mainta den nos edishon, refiriendo na e mucha pará na porta di e Toko den Kwartier, ku outo a dal, a bira un FakeNews pa CMC. Parse ku Curaçao Medical Center a gusta e palabra ‘FakeNews’ i awor ta nan punto fuerte di merkadeo.

Loke ku EXTRA a informá den nos edishon di ayera, ta loke mama di e kriatura ku outo a dal, a bisa nos. El a bisa kiko nan a inform’é na CMC esta ku ta debí na COVID no por atendé e yu einan, pero e bai kas i si e doló sigui nan a dun'é remedi pa doló sino e bin bèk CMC mainta. Tambe nan a dun'é un karta pa e bin djabièrnè awor CMC. E mucha tabata pata pata di doló. E mucha a kibra skouder i a haña basta sla ora e outo a dal e.

Remarkabel ta ku ayera mainta un ke otro dòkter na CMC a yama e mama di e yu bèk pa bis’é pa e bin CMC pa evaluashon. Einan nan a informá ku ora nan a wak e video di kiko a pasa, nan a disidí di ke evaluá e kaso mas mihó.

E informashon den nos korant ayera mainta a pone bosero di CMC rabia bastante, kalifiká nos informá komo ‘FakeNews’, ku a bisa e “stop woord” di CMC.

EXTRA no tin motibu pa kere ku loke  e mama a informá nos, no ta kuadra ku bèrdat. Ademas 9.28 djaluna nochi nos a manda e bosero sra. Gibbs di CMC un app pa puntr’é di e situashon aki i el a kontestá nos ayera mainta, den kareda di 5 or ku e no ta na altura di esaki i e ta bai puntra. Tambe nos a papia ku e bosero na telefòn i el a bisa ku e tabata drumí ora nos a tuma kontakto kuné.  Nos a bis’é di lo tuma e vershon di CMC pa pone den korant.

Nos no a logra yega asina leu, pero rápidamente a bin e mensahe “Bosnan kit’é ASAP òf nos ta pone ku ta FakeNews”.

Nos no por a kita algu ku ta e mayornan a bisa i ku ta kuadra ku bèrdat.

EXTRA  a komprondé ku ora skouder kibra no ta poné den yesu i tampoko ta operá. Pero pa kue nos informashon kompleto bisa ku ta FakeNews ta inaseptabel.

Meskos pa nos ta inaseptabel ku un dia promé CMC ta kue informashon di 4 korant i pone FakeNews, atrobe. Despues ku nos a tuma kontakto ku bosero di CMC sra. Gibbs, el a pidi diskulpa i ku tabata un eror di su departamento, i a koregí esaki.

EXTRA ta haña un lástima ku ta di e forma aki tin di atendé ku otro. Nos ta yama i atendé ora algu no ta kuadra ku bèrdat i si e supuesto FakeNews ku CMC ta pretendé ku nos tabatin ayera a kousa nan daño, ta kiko nos tin di bisa di esun di djaluna mainta di CMC kontra di nos.

E palabra” “FakeNews” ta infantil di parti di CMC i sigur no profeshonal i ménos ku e ta bini di un instituto manera Curaçao Medical Center.