WILLEMSTAD.- Falta di informashon den prosèsverbal, a pone ku hues a apsolvé shofùr di but.
Esaki un bia mas tabata e kaso den tratamentu di infrakshon di tráfiko.
Un damita di 19 aña, a bin korte pa motibu ku e no tabata di akuerdo ku e but ku el a risibí.
Segun e damita, el a haña un but pa motibu ku polis a bis’é ku e tabata papia na telefòn, miéntras e tabata kore outo.
E damita a bisa ku niun momento so esaki tabata e kaso.
El a splika hues, ku e dia ei e tabata skuchando músika via su telefòn, ku tabata poné den e baki mei mei bou di e radio.
Segun e damita, na momento ku polis a par’é i bis’é ku e ta na telefòn, el a splika nan ku esaki no ta bèrdat i a asta mustra nan su telefòn ku tabata na músika.
Esaki no a yuda ku nada i el a haña un but tòg.
Fiskal a duna di konos’é ku e loke tin skibí den e prosèsverbal no ta muchu kla i e verbalisante no ta deskribí presisamente den ki forma e shofùr tabata papiando na telefòn.
Mirando esaki, hues a bisa ku e ta bai di akuerdo ku fiskal i ta bari e but fo’i mesa.