WILLEMSTAD.- Esaki ta e di tres reorganisashon ku Kompania di Tou Kòrsou (KTK). Tur hende ta konsiente dje situashon di KTK ta pa motibu ku falta di refineria.  KTK a indiká na sindikato UGTK/CADMU ku nan ke baha gastu ku 25% i esaki ta nifiká ku alrededor di 20 hende ke papia ku nan riba retiro boluntario. Ta trata aki di hendenan ku ta serka di baha ku penshun. Esaki ta di tres reorganisashon ku KTK ta pasa den kaminda ta retirá hende. Esaki ta loke ku presidente di sindikato UGTK/CADMU sr. Wendell Muelen a duna di konosé na EXTRA.

Sr. Muelen a bisa tur loke ku ta pasa den e kompania ta regardá e situashon ku no tin refineria. Ta kada biaha ta karga e speransa ku e refineria ta bai habri, i te ainda esei no te kaso.

A bisa sindikato ke bin ku plan di reorganisashon. Sr. Muelen a bisa ku sindikato ta kontra di tur retiro forsoso. Pero nan ta realístiko ku e situashon dje kompania.

Minister a bisa di lo bai atendé e situashon i sindikato ta pendiente kiko minister tei hasi. Minister ta wak un solushon pa evitá retiro forsoso. Pero e solushon ei mester tei, i si e solushon ei no tei, mester ta basta realístiko ku lo yega na retiro.

Sr. Muelen a sigui bisa ku tabatin un pakete di retiro di 2020 riba mesa i trahadónan a opta pa tuma e pakete di 2020. Si  presentá e mesun pakete di 2020 trahadónan lo tum’e. UGTK/CADMU ta lamentá e situashon, nan ta kontra di retiro forsoso pero di otro banda ta realístiko ku situashon dje kompania.

Lo sòru pa tin un bon proposishon  riba mesa pa trahadónan por opta riba dje.

Fin di aña tabatin henter diskushon riba bónus kaminda tabatin mal kontentu bou di trahadónan, pasobra algun trahadó a kere ta sindikato a stroba nan di haña bónus. A pidi trahadónan pa entregá, pasobra tabata bai kita riba 30 i piku trahadó, pero a kita 20 piku. A bisa trahadónan pa entrega pa mas trahadó keda na trabou, i awor tin situashon di retiro.

Sr. Muelen a bisa ku tin algun hende ku a opta, mirando e situashon pa tuma e pakete último di 2020 i tuma nan retiro for di KTK. Ta wak kiko minister ta bin kuné.  Pero komo sindikato ta keda realístiko.

Sr. Muelen a bisa ku nan no ta bai tras di gritu ku mester kore ku gerensia. Hasiendo esei no ta bai logra nada. Ta gritu emoshonal. E kompania ta pasa den situashon difísil dor di falta di refineria.

Pa 80% KTK ta dependé di refineria, sr. Muelen a terminá bisando.