A haña 25 mil florin kèsh den e kas

WILLEMSTAD.- Un famia konsistí di 6 miembro tabata den sala di korte pa plantashon grandi di mariwana ku a haña na nan kas dia 10 di sèptèmber último. Ta trata di un mama ku 5 yunan hòmber i tambe un otro akusadó femenino nas’é na Colombia.
Ministerio Públiko ta akusá Jalmar Reina (34), Gilmar Reina (29) Undrich Reina (32) e akusado femenino L.B.G. (29), S.E. (51) i Dwight Reina. Tur ta keda akusá di tabatin plantashon di mariwana ku a pisa 1699 gram, mas 4 gram di hash i un kantidat di 6857 gram di mariwana. Segun e akusashon mas aleu, nan tabatin mas di 1800 planta di mariwana entre Cabo Verdeweg i Seru Fortunaweg. Tambe nan ta keda akusá di tabatin 2 arma kandela ku ta Glock i Smith & Wesson.
Tur tabata presente den sala pa nan kaso keda tratá den pro forma. Ambos akusado femenino a keda poné den libertat pendiente nan kaso keda tratá. Fiskal durante e kaso a pidi hues pa posponé detenshon di e akusadonan femenino i manda nan bèk prizòn. Fiskal a bisa ku nan tambe ta kómplise di e plantashon grandi kaminda benta di droga tabata tuma lugá na gran eskala, mirando ku polis a haña 25 mil florin kèsh den e kas.
Abogado mr Eisden a pidi pa suspendé detenshon tambe di Jalmar i Gilmar te dia ku e kaso keda tratá. Fiskal a pidi pa rechasá e petishon pasó tur hende ta kedando ketu den e kaso i no ke papia i bisa ken realmente ta doño di henter e plantashon.
Abogado Eisden na su turno a bisa ku Jalmar ta esun ku a para responsabel i a splika kiko ta pertenesé na dje.
Pa loke ta trata Gilmar, el a splika ku na aña 2017 el a haña un aksidente kaminda su man a keda lam i komo konseho médiko, el a haña tende ku si e operá su bida por ta na peliger. P’esei e ta usa hopi mariwana pa fria e doló nan inmenso ku e tin tur dia.
Hues Verbeek no a bai di akuerdo ku e petishon di fiskal pa manda e akusadonan femenino prizòn bèk, pasó e no a mira e motibu. El a bai di akuerdo si pa tur otro hende keda será i a posponé e kaso pa dia 12 di febrüari binidero, kaminda e kaso lo keda tratá integralmente.