WILLEMSTAD.- Blafmentu di kachó no ta algu ku mester bira un problema entre bisiñanan, i sigur den nos kultura. Te na ora ku blafmentu di kachó ta algu ku lo por ta kousa un tiki molèster, si papia ku otro lo por resolvé esei sin problema. Pero si bo tin bisiña ku no ta dispuesto pa papia i asta ta instigá e kachónan di otro hende, anto un ora pa otro bo por haña bo ku un eksploshon. I esei ta loke a sosodé den e fin di siman ku a pasa den kurá di famia Victorina na Cas Grandi.

T’asina ku e kaso di konfiskashon di kachó aki tabata tópiko di kòmbersashon den e dianan ku a pasa ya ku hopi hende por a mira e filmashonnan den kurá di famia Victorina ku por sierto un agente polisial a disidí di hasi riba su mes i pone esaki riba retnan sosial.

EXTRA a hiba un kòmbersashon ku un dje miembronan dje famia i nos por a komprondé ku ya nan a entamá pasonan hurídiko pa por haña nan kachónan bèk (3 fila). Pe motibu ei mes tambe nos lo no bai muchu den detaye ku e kaso aki. Pero loke si por bisa ta ku e kaso aki a start algun tempu pasá na momentu ku e bisiña denunsiante a kuminsá tenta/zundra e kachónan ya ku e ta konsiderá ku nan ta kousa molèster den e bario dor di blaf hopi.

Ta importante pa bisa tambe ku dor di trabounan riba nan tereno, e denunsiante mes a laga burakunan habrí di tal manera ku e kachó di bisiña por a pasa. No opstante esei famia Victorina a tuma e pasonan pa evitá un ke otro. Pero no ta parse ku denunsiante tabata konforme, ya ku el a pasa serka otro bisiñanan i kolektá firma komo sosten pa su denunsia.

Pero famia Victorina, sabiendo ku e bisiña aki tabata riba su krusada, a bai polis i a kòmbersá ku agente polisial B. kende a duna konseho kiko lo mester hasi pa evitá un konfrontashon. Esei ta loke nan a hasi tambe. Grandi tabata nan sorpresa ora ku nan a nota den fin di siman pasá ku ta e mesun agente polisial a presentá ku telefòn na man ta filma, i despues a post esaki riba retnan sosial i asina eksponé e famia den lus negativo. Pues e agente B. tabatin ròl di ‘kuchú di dos banda’.

Nan ta puntra te kon leu lo por konfia polis den kualke asuntu, i nan ta hopi indigná. Ta di komprondé pa motibu ku e lo mester a defendé e denunsiante ku ta un empleado di Ministerio Públiko.

Pero entretantu e kaso aki ta den e ámbito legal kaba, a envolví abogado. Tin asta denunsia kontra tantu e agente polisial komo e denunsiante ku lo a saka mentira ku e kachó lo a morde un yu di dje, siendo ku den su kas no tin niun ser humano ku ta parse un mucha.

Próksimamente nos lo duna mas informashon respekto e kaso aki.

(Foto File)