WILLEMSTAD.- Korte lo bai trata kaso di e famia di fam Reina ku ta será pa plantashon grandi di mariwana.
Un di e miembronan di e famia a keda detené huntu ku henter sobrá famia ku ta konsistí di 6 persona. Tur ta keda akusá pa e plantashon grandi di mariwana ku a haña na nan kas dia 10 di sèptèmber 2020.
Polis a bai ku henter e famia ku ta konsistí di un mama ku 5 yu hòmber i tambe un otro akusadó femenino nasé na Colombia ku tabata biba ei nan.
Segun Ministerio Públiko, polis a pisa na total e kantidat di 1699 gram di mariwana, 4 gram di hash i un otro kantidat di 6857 gram di mariwana. Segun e akusashon mas aleu, nan tabatin mas di 1800 planta di mariwana entre Cabo Verdeweg i Seru Fortunaweg. Tambe nan ta keda akusá di tabatin 2 arma kandela ku ta Glock i Smith & Wesson. ‘Durante tratamentu pro forma ámbos akusado femenino a keda poné den libertat pendiente nan kaso keda tratá.
Tambe polis a haña 25 mil florin kèsh den e kas.
Abogado di un di e miembronan di famia a pidi pa suspendé detenshon di e akusado.
Segun e abogado su kliente no tin nada di aber ku e plantashon ku a haña riba e tereno. Mas aleu su abogado a bisa, ku e akusado ke bai kaba su skol.
Fiskal na su turno a pidi pa rechasá e petishon pasó tur hende ta kedando ketu den e kaso i no ke papia i bisa ken realmente ta doño di henter e plantashon.
Ademas di esei fiskal a bisa durante entrada hudisial a haña basta saku di mariwana den baño di e akusado.
Mirando tur esakinan, hues a bisa ku sospecho kontra di e akusadonan ta fuerte i mester keda será. E kaso lo keda tratá mañan integralmente.