WILLEMSTAD.- Famia Verginie ta konsiderando pa bai un prosedura a fondo kontra di gobièrnu, kaminda lo bai pidi e total dje daño ku señora Maureen a risibí ora e muraya di “karnaval” a kai riba dje i dor di kual el a bira inválido. Esaki ta loke ku abogado dje famia mr. Pols a duna di konosé na EXTRA.
Dia 2 novèmber último wes den un huisio sumario a dikta ku gobièrnu tabatin falta di no a protehá e siudadano sufisiente di e muraya defisiente aki riba ruta di karnaval. P’esei e ta honra un vorskòt di 250 mil florin na sra. Verginie i gobièrnu mester paga esaki mesora.
Dos luna a pasá, i riba pregunta di EXTRA na mr. Pols si gobièrnu a kumpli, esaki lo a sosodé. Gobièrnu a haña su mes obligá di paga konforme e sentensia. E desishon di Korte ta "uitvoerbaar bij voorraad verklaard" manera ku a pidi Korte. Esei ke men ku lo a buta beslag riba gobièrnu si a kaso nan lo no a paga "boluntariamente".
Sinembargo, e 250 mil florin tabata nada mas ku un adelanto riba tur e daño ku señora Verginie a hiba, a konsekuensia di e kaida di e muraya.
Mr. Pols a pidi pa un reunion ku gobièrnu, ku mester a tuma lugá denter di dos siman despues di e sentensia. Asina partidonan por a palabrá e trayektorio kon ta sigui pa yega na un daño perhuisio kompletu. Pero segun mr. Pols a bisa EXTRA ku nan no a haña invitashon mas di parti di gobièrnu.
Atrobe falta di interes di parti gobièrnu, i e famia ta kansa i ta kla pa sigui ku e kaso a fondo. Esaki nan lo hasi tambe i ta preparando pa entregá e petishon na korte promé ku fin di aña.
E kalkulashonnan ku e famia a hasi di daño dor di kaida dje muraya ta Naf 1.6 mion. Den un huisio sumario kasi nunka no tin base pa risibí un suma kompletu. P’esei e abogado na nòmber dje famia a pidi Naf 500 mil den huisio sumario, komo vorskòt. Pero hues a disidí ku un vorskòt supstansial ta na su lugá, i a dikta ku gobièrnu mester paga Naf 250.000.
Na momentu ku bai e prosedura a fondo, e famia por pidi e daño total di 1,6 mion, kitando e Naf 250.000, pues NAf 1.350.000,-- lo bai pidi.