WILLEMSTAD.-Famianan a pidi ayera pa e morto di Jurlianne i Quïn-drick Joe no ta en vano. Un miembro di e famia a pidi esei ayera na e despedida emoshonal ku a sali for di El Tributo na Otrobanda pa bai dera den Misa di Janwé. E mama i yu a muri den un aksidente di tráfiko ku a tuma lugá dia 16 di ougùstùs último na De Savaan. Nan tabata krusando kaya na momentu ku un vehíkulo ku tabata kore den forma iresponsabel i pa kolmo a pasa den lus kòrá a interseptá nan. Nan a muri na e sitio di e aksidente. E shofùr ku a protagonisá e aksidente ku dos morto ta detené en konekshon ku e kaso aki.

Esnan ku a asistí na e entiero ayera for di momentu ku nan a drenta e sala di despedida por a tuma nota ku mama i yu tabata den e mesun kaha di morto. E área di e kaha di morto tabata dòrná ku blasnan blanku, blou i lila. Na banda tabatin adorno manera na un fiesta di piñata.

Esei ta un momentu ku sigur a hasi un impakto enorme riba esnan  ku a bin duna kondolensia di kua hopi ya kaba tabata konsterná pa loke a pasa 10 dia pasá.  Na e entiero a asistí Gobernador Lucille George-Wout i su kasá, promé minister Eugène Rhuggenaath i diferente miembro di su gabinete i representantenan di bida sosial riba nos isla.

Un miembro di e kuerpo di dosente kaminda Jurlianne tabata bai skol a bisa ku e víktima tabata determiná pa bai dilanti no opstante ku e tabatin un yu chikitu. Promé dia di skol un dia promé ku e aksidente, Jurlianne a indiká ku e lo bai studia den futuro na Canada, asina e dosente a bisa. Kosnan no a yega dje leu pero na su konsepto Jurlianne a sobresalí pa su determinashon pa sigui bai dilanti den bida no opstante e hechu ku e tin un yu. Den e kuadro ei, e ta un ehèmpel pa tur hóben ni maske kiko nan topa den nan kaminda.

Un bosero di e famia a bisa na e entiero ku Jurlianne a destaká komo un hóben ku motivashon i determinashon. E deseo di e famia ta pa e morto di Jurlianne i su yu no ta en bano. Segun e bosero, ya kaba a kuminsá traha riba diferente proposishon pa atendé ku un tráfiko mas sigur na Kòrsou. “Nos debe Jurlianne i su yu esei”, asina el a bisa.

Pastor Flores ku a guia e seremonia di despedida a bisa ku ta trata di un momentu difísil den bida di famia i amigunan. Einan mes el a pidi pa sostené otro i pa tin sigur ku nos Señor tin un lugá speshal pa e víktimanan den su reino. “Tuma despedida no ta fásil, sigur ora ta trata di un tiner i su yu. Pero mester buska fortalesa serka Señor”, asina e pastor a bisa.

Na momentu ku e korteho funebre a sali for di El Tributo a laga e blasnan bai komo señal di konvivensia ku otro loke sigur tambe tabata un momentu emotivo. Na santana a parti pelucho i ko'i hunga pa e muchanan por a depositá den e kèlder kaminda e dos víktimanan a haña nan último lugá di sosiegu. Konsiderando e remarke i komentarionan riba e kaso, por konkluí ku e aksidente aki a kousa un impakto enorme den komunidat di Kòrsou.

EXTRA ta deseá e famia, amigu i konosínan deskanso ku e

morto trágiko aki.