‘Ta bibando den diktadura i opreshon’

WILLEMSTAD.- “E úniko konklushon ku ta yega na dje ta ku na Kòrsou ta bibando bou di un diktadura i opreshon.” Asina miembro di direktiva di PAR, Luigi Faneyte ta trese dilanti. Na su opinion pueblo mester ta sumamente preokupá ku deterioro di demokrasia i estado di derecho.

“Esaki ta e fundeshi di nos sistema di gobernashon ku ta duna alabes guia i struktura na funshonamentu di nos sosiedat na un manera ordená i responsabel.” Segun Faneyte Kòrsou no ta e promé pais na mundu ku ta pasa den man di polítikonan ku tendensia diktatorial, pero si no aktua na tempu lo sosodé ku Kòrsou meskos ku a sosodé na otro paisnan ku a tolerá tipo di polítikonan asina.

“Pueblo tuma nota ku e gobièrnu aktual enkabesá pa MFK, promé ku sosten di PNP i awor sostené pa KEM i Zita Jesus-Leito a eradiká e fundeshi di nos demokrasia. Un gobièrnu ku a para e tradishonal ‘konferensia di prensa’ semanal i ku esaki a eliminá transparensia strobando prensa (e di kuater pilá demokrátiko) di kuestioná maneho di gobièrnu.”

Pió ainda, segun Faneyte ta ku  e aktual gobièrnu enkabesá pa MFK, ta mina outoridat di parlamento kaminda e presidente den kolaborashon ku ministernan ta keda sin yama reunion. “Esaki ta inkluso tópikonan urgente manera posibel aktonan ilegal di entre otro ministernan Javier Silvania, Gilmar Pisas i Charles Cooper ku ta bisa públikamente ku e NO ta kontestá Parlamento.”

Faneyte ta sigui bisa ku Silvania ta gasta sèn di pueblo pa kosnan populista i pidi hende vota p’e lokual ta un akto koruptivo i kastigabel. “Rondó di minister Cooper tambe tin tur motibu pa pensa ku tin iregularidat ta tuma lugá”, segun e miembro di direktiva di PAR.

Aki Faneyte ta referí na Fundashon Kas Popular ku a sera dilnan ku e kompania Hospitality Development & More relashoná ku benta di kasnan den sentro di siudat. Tambe e proyekto di konstrukshon di kas, “Mi Casa Ya”, i na servisio di Obranan Públiko kaminda kompanianan di “friends & family” ta den dil di trabounan pa asfaltá kaya ta lanta interogatorio serka Faneyte.

E ta mustra mas aleu ku gobièrnu di MFK enkabesá pa Pisas ta sostené negoshi di refineria ku un kompania manera CPR ku no ta kalifiká i ta presentá dokumentunan falsu mas otro dilnan dudoso ku kompanianan Oryx, Global Oil i PDVSA. “Kompra di Campo Alegre pa hopi mion florin na lugá di invertí den enseñansa ta otro ehèmpel.”

Finalmente Faneyte ta menshoná un kantidat di desishon di gabinete Pisas II ku na su opinion ta demostrá kon ta eradiká demokrasia. “Ta promové glas skur pa outo kreando situashonnan peligroso den tráfiko i pa polis ku ta ehersé su trabou tur dia riba kaya, maneho erátiko ku ta menasá salubridat públiko, no ta respetá institutonan SER, Raad van Advies i Kontraloria General, ta debilitá Ministerio Públiko i Kuerpo Polisial miéntras ministernan ta rondoná nan mes ku ‘body guard’ i premia nan mes ku biahenan di luho i tarheta di krédito di 25 mil dòler, ta silensiá i humiá un ámtenar ku ta hasi su trabou i parlamentarionan manera Gibi Doran ta kalumniá kontra direktor di kompania pa tapa eror di Silvania i despues ta propagá rasismo i krea divishon den pueblo.”

Foto:

...Luigi Faneyte...