‘Presidente di parlamento mester yama reunion públiko urgente’

WILLEMSTAD.- Presidente di parlamento, Charetti America-Francisca mester asumí su responsabilidat i yama reunion públiko di parlamento rápidamente pa atendé e aktonan sospechoso di parti minister di Finansa, Javier Silvania pa duna eksonerashon di impuesto. “For di e reunion di Komishon Sentral di parlamento di 19 di ougùstùs 2024, no por konkluí nada otro ku minister Silvania a aktua manera un kriminal ku ta despistá, esta brua hende, pa asina komunidat no haña sa e bèrdat.”

Asina miembro di direktiva di Partido PAR, Luigi Faneyte ta trese dilanti. E ta splika ku den e reunion kontinuamente Silvania a ripití ku e no a duna eksonerashon di debe di impuesto i ku el a aktua konforme lei. “Sinembargo ta opvio ku Silvania á duna eksonerashon i ku Silvania no a aktua konforme lei.”

Pa e motibu aki, segun Faneyte, e minister mester publiká rápidamente e konsehonan di Ontvanger/konsehero Wim Nijdam, Directie Fiscale Zaken i e “omslag”, (portada) di e proposishon ku e minister a bai Konseho di Minister kuné, kaminda Konseho di Minister a pone su aprobashon ku remarkenan riba dje.

“Di e e forma aki Silvania ta demostrá ku el a sigui e aprobashon di Konseho di Minister. Ademas Silvania mester splika dikon el a desviá for di e aprobashon di Konseho di Minister i alabes desviá for di e fecha (“dagtekening”) pa eksonerá tur impuesto di 2017 i mas promé.”

Faneyte ta bisa di di ta disponé di informashon konkreto for di eksponentenan haltu di partido MFK, partikularmente ligá ku e kampo di minister Cooper, ku ta ekspresá ku Silavania por kai será pa e aktonan kometé. “E mesun eksponentenan aki a splika ku Silvania no a tene su mes na e aprobashon ku el a risibí di Konseho di Minister i a bai su propio kaminda.”

Si tin mas dokumentu ku ta splika òf supstansiá su akshon, Silvania mester publiká esakinan tambe, e miembro di PAR ta sigui bisa. “Komo e ta papia di transparensia, e mester demostrá esaki i publiká e dokumentunan.”

Por sierto e presensia di e kuater otro ministernan den sala di parlamento, supuestamente pa duna sosten na Silvania, ta parse mas un komportashon di un gèn ku a bin pa sostené nan miembro pa tapa e bèrdat, di akuerdo ku Faneyte. “Nan sosten no ta saka Silvania liber di su kulpabilidat, pero mas bien ta hasi nan tur kómplise den e akto ilegal aki di e minister.

Miéntras e ministernan ta sostené Silvania públikamente den su manipulashon i di ta malinformá Parlamento i komunidat, realidat ta, segun Faneyte, ku nan ta na altura di tur lokual a sosodé. “P’esei PNP a bandoná e tarima i nan a logra hasi esaki nèt na tempu.”

Un alternativa ta pa promé minister, Gilmar Pisas mes publiká e dokumentonan i asina terminá e odisea aki. “Tene na kuenta ku un dia tur kos lo sali na lus di dia”, e miembro di direktiva di partido PAR ta terminá bisando.”

Foto:

...Luigi Faneyte...