E nòmber Favela ta portugues di Brasil. Ta trata di terenonan ku hendenan ku poko entrada ta poderá di dje i hasi nan bibá. Barionan grandi ku bo por haña na kosta pero tambe mei mei di Brasil. E barionan aki ta basta atraktivo pa nan kultura i nan kreatividat. Aki na Kòrsou nos tin un proyekto Favela Street Kòrsou.

Ta trata di un proyekto di un organisashon di futbòl di kaya. Favela Street ta krea un generashon nobo di hóbennan den barionan ménos pudiente pa nan bira ehèmpelnan positivo. Favela Street ta lucha kontra e eksklushon sosial di e hóbennan di barionan ménos pudiente i e loke nan ta usa pa logra esaki ta e futbòl di kaya.

Ta pone énfasis riba e talento di e hóbennan i ta mira nan komo héroenan. Ademas ta pone énfasis riba oportunidatnan potensial di edukashon i trabou pa nan. Favela Street ta konstruí un brùg entre e hóbennan aki ku sosiedat i ta ofresé nan e oportunidat di bida ku nan meresé. Favela Street ta kere firmemente den talento di e hóbennan aki. Roxanne Hehakaija a trese Favela Street Kòrsou i huntu kuné Salimatou Bah ku ta guia e hóbennan. Rocky ta direktora di e fundashon Favela Street. Ta trata di un hulandes kende su kara no ta un deskonosí, en partikular den e mundu internashonal di futbòl di kaya. Komo úniko miembro femenino di Street Legends, e mihó tim di futbòl di kaya na mundu, e tin un pashon pa futbòl di kaya, el a hunga den Jong Oranje. Simplemente den Rocky su sanger tin deporte ta kore.

Hóbennan ehemplar...

Djasabra a papia ku tres di e hóbennan modelo di Favela Street; Quincin Dorothea konosí komo Rogier, Stephany Passial i tambe Shurylianne Leito konosí komo Shuku. E tres hóbennan aki komo ehèmpelnan di nos sosiedat ta guiando esnan mas chikí.

Rogier...

Quincin ta konta ku na skol nan a bisa nan ku tin un mucha muhé makamba lo bin skol. Nan a bai hunga futbòl i ora e mucha muhé a bin Kòrsou i e mes a splika kiko ta Favela Street. No ta simplemente hunga futbòl pero organisá den bario, siña nan bira coach, un ehèmpel. Tabata den fakansi di resurekshon 2019 Rocky a bin Kòrsou i nana kuminsá na Maris Stella VSBO ku tayernan. Asina tiki tiki nan a kuminsá siña weganan pa ora nan haña e muchanan nan dilanti nan sa kon pa dil ku nan. Awor aki segun Rogier nan ta bezig ku kontamentu di historia. Esei tambe nan ta siñando ainda, kon pa konta bo historia na un manera interesante. I banda di tur esaki nan a hunga bala. Rogier ta un coach awor aki. E huntu ku Steph a kuminsá na Albert Schweitzer i Marnix ku muchanan di dos aña i mei pa kuater aña, hasiendo wega ku nan. E skolnan mes ta aserka Rocky i na su turno e ta manda su coachnan. Rocky mes ta na Hulanda aktualmente i Steph a keda ku enkargo pa huntu ku Rogier nan ta bishitá e skolnan pa hasi wega ku muchanan.

Shuku...

Shuku tambe ta otro hóben coach. Shuku tabata den tim di futbòl Vesta. Einan nan a bisa nan ku tin un mucha muhé ta bin Kòrsou relashoná ku futbòl i Shuku a bai na e tayernan. Pero su promé dia einan e no a hunga bala pero a sinta wak. Despues ku Rocky a introdusí su mes, Shuku a disidí ku e ta interesante pa e sigui bai. Loke mas Shuku a gusta ta e forma ku Rocky ta laga nan sera konosí ku nan mes. Nan ta haña enkargá nan pa hasi pa nan sera konosí ku nan mes mas. Tambe kon ta traha ku otro den grupo i el a yega asina leu ku e ta guia hóbennan na VSBO St Joseph. Shuku mes tambe ta bayendo skol i p'esei e guianan no ta ora di skol. Dor di COVID tin skol un siman si i otro no i den e siman liber Steph tambe ta bai ku nan. Shuku tabata bai mas den fakansi grandi.

Steph...

Stephany ku nos konosé komo Steph a splika ku e tambe ta den tim di futbòl. Einan e invitashon i asina el a sera konosí ku Rocky. For di e tayernan el a saka Disiplina, Den tur kos bo mester tin disiplina pa bo logra. Promé ku esaki Steph tabata hasi deporte pero tin bia poko floho. Awor despues di e tayernan aki el a siña ku disiplina e tin di traha.

No ta fásil traha ku mucha chikí...

No ta fásil traha ku e muchanan pero tur kos por basta bo ke, segun Rogier a bisa Djasabra. Bo mester tin hopi pasenshi ku e muchanan chikí i adaptá e weganan na e edat di e mucha. Den prinsipio Rogier a pensa kompletamente otro pero nada ta imposibel. Nan lo saka Rocky su kara i huntu ku Steph nan mes ta hinka e weganan den otro. Entre otro ta ròl bala, tira bala den hula hup i hopi mas.

Rogier a sigui bisa ku nunka el a pensa di traha ku mucha chikí. E tin ruman i primu chikí pero nunka el a pensa di traha ku mucha chikí asina. E ta kòrda ku su wela tabata bis’é ku parse ku e no ta gusta mucha pero tòg awor e ta traha ku mucha i ku hopi pasenshi. Tiki tiki nan ta siña.

Pa Steph tambe tabata poko difísil traha ku e muchanan pasobra tin di nan tin miedu. Pero nan a sòru bira amiga di e muchanan i ku nan komo coach ta komprondé pa nan. Nan ta adaptá e weganan pa e muchanan por komprondé i despues pa e muchanan mes por hasié. Na Albert Schweitzer i Marnix a bai basta fásil pasobra e muchanan ta tende bon. Steph a splika ku e ta bai Joan Maurits tambe kaminda e ta bai hasi deporte ku e muchanan mas grandi. I asta a yega asina leu ku e tin di duna e muchanan sifra en nan hasimentu di deporte. Steph ta traha ku tur mucha. E proyekto aki ta pa tur mucha i asta esnan mas grandi ku nan mes.

Nan futuro...

Rogier a bisa ku nan a hasi proyektonan ku hende mas grandi. E promé bia ku Rocky a bin Kòrsou nan a organisá mas di 10 aktividat. Nan a bai focus riba organisá pero e di dos bia ku Rocky a bin ta pa trein nan mes. No e parti di futbòl so pero kon pa trein nan mes pa ora Rocky no tei, kos por sigui kana.

Steph a bisa ku e ke bira dosente di deporte. I ku Favela Street ta nèt su chèns pa e por trein su mes. I esei e ta trahando ariba. Rogier di su parti ke bira manera Rocky ku tur hende konosé i ku hopi hende por bin su aktividatnan, Shuku di su parti ke pa Favela Street keda. Nan sa ku Rocky no tei pa semper i p'esei ta bon pa nan ta e lider ku mas mucha bou di nan pa e muchanan por bai nan tayernan pa asina por siña e muchanan loke ku Rocky a siña nan.

Awor aki den e organisashon nan ta 15 hóben ku ta guia. I nan tur ta huntu ora Rocky bin Kòrsou i mayoria bia nan ta topa na Montaña Abou pa partisipá na tayernan ku Rocky ta presentá.

E intenshon di e proyekto aki ta pa e hóbennan ta ehèmpel pa otronan. Steph a bisa ku e ta sinti ku e ta un ehèmpel pa otronan sigur. Awor aki mes yen kaminda ku e yega ya yen hende konosé. Rogier tambe ta konosí kaba hopi kaminda ku e bai i esaki danki na Favela Street.

Mensahe...

Pa esnan ku no ta organisá den kosnan positivo ainda, Steph ta pensa ku semper botin di bai tras di bo soño i si bo soño ta pa organisá algu bai pe. Si e salu malu un bia sigui tòg pasobra el o bai bon un dia. Shuku a bisa ku nan tur ta hóben i tin bia ta bisa no tin nada di hasi pero si sali i buska ta haña algu di hasi òf buska Favela Street Kòrsou. Rogier di su parti a bisa ku si bo tin soño bai pe i no keda den kas pasobra e soño no ta kana bin serka bo. Komo hóben tin bia nos tin miedu pero esei no mester ta e kos. Sin bèrgwensa bo ta lucha, pusha i perseverá. No bo tin kana Si bo tin di buska.

Por tuma konta ku info@favela-street.com pa mas informashon.