W’STAD/NEW YORK.- E agensia merikano konosí komo “Food and Drug Administration” (FDA) resientemente a konfirmá ku e sistema eléktriko ‘heated tobacco’ di IQOS di Philip Morris International ta apropiá pa protekshon di salú públiko i komo tal a outorisá esaki pa ser bendé na Merka. E desishon aki di FDA ta unu ku ta bini despues ku PMI a subi merkado i demostrá loke e tin di ofresé i komo tal a hasi un aplikashon serka e agensia for di 2017 pa su aprobashon.

Kontrali na sigaria, e sistema di IQOS ta kalentá i no ta kima e tabako, i ta duna e humadó e sensashon di un sigaria normal, pero sin ta kima e komponentenan dañino. Esaki ta e promé produkto ku di un forma eléktriko ta ser kalentá i ku ta ser kualifiká pa benta na Merka. Esaki ta kai denter dje legislashon merikano di 2009 ku ta duna FDA e poder pa regulá produktonan di tabako, inkluyendo produktonan inovativo.

Komo komentario riba e anunsio di FDA, André Calantzopoulos, CEO di Philip Morris International a duna di konosé: “E desishon di FDA pa outorisá IQOS na Merka ta un paso importante pa e mas di 40 mion hòmber i muhénan merikano ku ta huma. Tin di nan ku lo stòp. Tin di nan no, pero pa nan IQOS ta ofresé un alternativa pa nan sigui huma. Den apénas dos aña 7.3 mion hende rònt mundu a kita for di sigaria i a kambia kompletamente pa IQOS. E desishon djawe di FDA ta hasi e oportunidat aki disponibel pa humadónan adulto merikano. Nos tur na PMI ta determiná pa remplasá sigaria dor di alternativanan liber di huma ku ta kombiná teknologia sofistiká i balidashon sientífiko intensivo. E anunsio di FDA ta un logro históriko.”

El a agregá bisando ku: “Esaki tambe ta pone liñanan komersial kla, inkluyendo rekerimentunan di merkado ku ta maksimalisá e oportunidat pa adultonan pa kambia di sigaria i ta minimalisá e uso no intenshoná. Nos ta sostené e ophetivo aki kompletamente. FDA a pone un standart haltu i nos tin intenshon di traha ku nan pa implementá e desishon pa asina asina IQOS alkansá e oudiensia korekto, ku ta e aktual humadónan adulto.”

PMI lo introdusí IQOS riba merkado merikano atraves di un lisensia eksklusivo ku Altria Group Inc., ku tin su supsidiario Philip Morris USA ku tin e ekspertisio i infrastruktura riba merkado pa sigurá un lansamentu eksitoso.