‘Sport Week” di FDDK a ranka sali

WILLEMSTAD.-Fundashon Desaroyo Deportivo Kòrsou (FDDK) a start awe ku loke nan a titulá ‘Sport Week’. Ta e intenshon pa durante di e temporada aki nan tene diferente seshon, e.o charlanan, kumbre i diferente otro evento mas. A kuminsá awe djasabra ku un rekorido na vários área deportivo na Kòrsou manera pisina Bennie Leito, Stadion di Rif, Sentro Deportivo Kòrsou i otronan. Extra tabata presente i a dokumentá esaki.

Manera indiká a kuminsá ku un tour ku invitadonan ekstranhero ku tei pa tuma nota di e fasilidatnan deportivo na Kòrsou i pa wak te kon leu lo por duna un kontribushon. Ta trata di posibel invershonistanan di Ulanda ku a partisipá na e tour pa bishita e fasilidatnan deportivo. Ta bon konosí ku Kòrsou tin vários fasilidat deportivo pero den hopi kaso e problema di falta di mantenshon ta un problema hopi serio.

Aparte di e tereno i fasilidatnan ya menshoná a bai tambe na Suffisant, Mon Repos, Quick 60 i algun otro mas. Dirigentenan di FDDK a duna splikashon kua ta e problemanan ku nan ta konfrontá. Por ehèmpel a splika ku den pasado gobièrnu tabata duna un tereno di deporte na un persona pa e por manehá esaki, pero despues e kos ta bira un problema den kaso ku e persona muri. A siña lès for di esei i ta duna tereno na organisashon pa nan manehá e tereno òf fasilidat.

Na SDK e grupo a haña un sorpresa sumamente agradabel na momentu ku Churandy Martina a sali i bin kuminda nan. Churandy ta gosa di apresio total den Reino.

Tabata interesante di tuma nota di e reakshon di e bishitantenan ora nan tuma nota kiko ta e montantenan ku ta rekerí pa drecha i mantené unu òf mas fasilidatnan deportivo.

E kombinashon di foto ta ilustrá momentu ku e grupo ta keiru den bus i tambe na momentu ku nan tabata bishita e diferente sitionan.