Kumbre/Ban Move den Bario i mas aktividat

WILLEMSTAD.-Fundashon Desaroyo Deporte Kòrsou (FDDK) ta determiná pa pone Kòrsou move mas! Awe ta tumando luga Evolution Summit, un kumbre den kua ta bai profundo den e nesesidatnan di deporte i e situashon di deporte na Kòrsou en partikular. For di mainta e kumbre a kuminsá na Amasia AMICORP i lo dura te atardi. Mas atardi lo tin ‘Ban Move den Bario’ esei ta tuma lugá na Churchill Plaza di 7’or pa 8’or di anochi, mientras ku na mes momentu anochi lo tin e wega di futbòl Kòrsou kontra St. Lucia den stadion Ergilio Hato.

Manera EXTRA a informá for di djasabra último, FDDK a organisá siman di deporte i durante di e siman aki a pone atenshon kompletu riba deporte. Deporte ta bon pa salu físiko i mental di grandi i chiki, i banda di esei deporte a demostrá ku e ta fungi komo un faktor di union enorme den e pais aki.

Den kuadro di Sports Week tin awe djaluna i mayan 19 di novèmber e kumbre riba deporte. Banda di esei lo tin vários aktividat ku e meta pa inspirá i stimulá otro organisashonnan pa nan organisa nan siman di deporte. Tur organisashon i kompania na Kòrsou por organisá nan siman di deporte. Di e forma aki FDDK ta yuda pone lus riba deporte i por sostené e organisashon i kompanianan habri bista riba deporte. E aktividat di Ban Move den Bario di djamars 19 lo ta den bario di Montaña.

Dianan 20 i 21 di novèmber, respektivamente djarason i djaweps awor lo tin e “Youth Sport Pulse”, esei ta otro kumbre pero e ta tumá lugá na e komunidat di skol na Parera. Tres skol lo partisipá den karate, kickboxing, boxing i tambe atletismo. Djarason 20 novèmber e aktividat di move den bario lo ta na Sentro di Bario Brievengt di 7’or pa 8’or. Diaweps 21 di november Ban Move den Bario lo ta na Kolegio Annie Koenraad na Tera Kora.

Promové bo deporte faborito na trabou

Djabièrnè 22 di novèmber tur hende por bisti e paña/unifòrm di su deporte faborito i bai trabou. Kòrda mèldu na FDDK pa asina saka potrèt i post esaki riba Facebook.

Djasabra 23 di novèmber e siman di deporte ta finalisa ku weganan di pinpon na sentro Irene Moreno di 4’or pa 8’or anochi. Den mesun orario ei lo tin Family Cup na stadion Ergilio Hato i na Wilhelminaplein lo tin tres partido dio basket. FDDK lo kombertí Wilhelminaplein den un kancha grandi di basket. Esakinan tambe lo ta for di 4’or atardi te 8’or anochi.