WILLEMSTAD. - Fecha di entrega di hospital tabata plania pa 26 sèptèmber 2017, debí na tur e problemanan durante di e trayekto di konstrukshon e fecha a bira awor 13 di ougùstùs 2018 i posibilidat ta grandi ku e fecha aki tampoko lo no ta esun definitivo. Hospital lo keda kla un kaminda den 2019, asina Parlamentario sr. Gerrit Schotte a duna di konosé ayera durante un rueda di prensa.

Ayera Schotte a presentá ku e rapòrt trahá di parti di ekspertonan belgikano, riba e konstrukshon di Hospital Nobo, ku ta revelá ku si tin retraso den e otro fasenan, lo bai tin mas retraso.

No solamente por bisa ku tin retraso i ku e hospital lo no keda kla pa e fecha nan planiá, pero podisé lo keda kla den 2019, pa motibu ku esaki ta dependé si e otro proyektonan ku tin di tuma lugá rondó di konstrukshon di Hospital Nobo lo tuma lugá segun nan konseho.

Schotte a bai bèk un poko den pasado, kaminda ku Hospital Nobo lo mester tabata kla na 2014, i esaki riba tereno di Amstel.

Pero kambio di tereno di Amstel pa bai Otrobanda  ta pone ku si sigui tur e fayonan ku ta tumando lugá sigui, e hospital lo no keda kla ni den 2019.

Na opinion di Schotte, ironia ta ku un hospital ku lo mester tabata kla den dos aña, ta yegando kuater aña i ainda tin hopi faktor ku ta pone ku hospital lo no keda kla pa e tempunan aki.

Mester indiká ku na algun  okashon durante e rueda di prensa, Schotte a asta menshoná aña 2020.