WILLEMSTAD.- Un siman despues di elekshon, mester a kita propagandanan polítiko for di kaminda públiko. Pero segun EXTRA a tuma nota den dianan ku a pasa, sigur 3 siman despues di elekshon, ainda e propagandanan tei.

Nos por ta kòrda riba e informashon aki di ROP; Servisio pa Planifikashon Urbano (ROP) un biaha mas ta rekordá komunidat i partidonan polítiko en partikular tokante reglanan vigente pa propaganda polítiko den áreanan públiko. Por trata aki di bòrchi, bandera òf kualke otro opheto. Tur partido polítiko por pone nan propaganda polítiko segun e maneho di propaganda. Esaki ta enserá ku por pone propaganda for di dia di entrega di lista di partidonan polítiko ku tabata dia 21 di yanüari último te ku 8 dia despues di e fecha di elekshon, esta 27 di mart 2021. Esaki ta konforme “Landsverordening Openbare  Orde” (LOO) artíkulo 16 insiso 4. ROP ta hasi un apelashon na tur partido pa nan tene nan mes na e reglanan.

Esei tabata e informashon ku a sali for di promé ku elekshon, kòrdando partidonan pa tene nan mes na regla. Promé ku elekshon e propagandanan a keda pone ku smak, pero awe na 3 siman despues di elekshon i sigur 2 siman despues di e fecha pa kita e propagandanan, nan tei ainda.