WILLEMSTAD. - E último dia di registrashon na Kámara di Komersio den e registro di benefisiarionan final i otronan ku interes (Ultimate Beneficial Owner, registro di UBO), a keda suspendé pa dia 30 di sèptèmber 2025. Esaki Minister di Finansa a duna di konosé riba su portal. Inisialmente e fecha final tabata stipulá pa promé di yüli otro siman, pero e echo ku pa un motibu òf otro, hopi kompania, fundashon i asosiashonnan  no a registrá i pa evitá un but di 25.000 florin, Minister a duna dos luna mas pa kumpli ku e registrashon.

Dia 25 di yüni último Extra a dedik’é un relato amplio riba e partikularidat aki i tambe e difikultatnan ku sierto entidatnan ta konfrontando ku e registrashon no a tuma lugá.

Un di e opstákulonan ta number di crib, prinsipalmente pa asosiashonnan i fundashon.

Manera ta konosí, ta trata di un lei ku a drenta na vigor for di aña pasá. A habri un registro (UBO) pa kumpli ku artíkulo 45, insiso 15 i 16 di e Ordenansa Nashonal General Impuestonan Nashonal kaminda a inkluí ku esun obligá pa e atministrashon mester duna informashon enkuantu e benefisiarionan final na un entidat designá ku efekto general, kaminda ta pone regla tambe tokante e forma i kontenido di e registro di UBO i kon mester reportá e informashon.

A designá Kámara di Komèrsio i Industria (‘Kámara’) komo e entidat ku ta tene un registro di UBO.

E lei instituí ta pa garantisá integridat di e sistema finansiero i den e kuadro ei pa kombatí krímennan fiskal i froude, meskos ku finansiamentu di terorismo, labamentu di plaka i korupshon.

Pa promové transparensia den e konteksto aki ta nesesario pa konosé e benefisiarionan final, esta e ‘UBO’-nan, di entidatnan hurídiko, sosiedatnan personal, trùstnan i konstrukshonnan hurídiko similar, tur indiká komo órganonan.

Pa medio di institushon di un registro di UBO na Kòrsou ta garantisá e transparensia nesesario, ku e Financial Action Task Force di OECD a rekomendá.

For di dia 27 di mei 2025 Kámara a habri un portal pa efektuá e deklarashon obligatorio pa registrashon di UBO den e registro. E portal ta duna sierto guia a base di e forma hurídiko den e proseso pa deklará e datonan, tambe riba e punto di e dokumentonan ku mester kompañá esei. E portal ta alkansabel riba wèpsait di Kámara (link https://ubo.curacao-chamber.cw).