WILLEMSTAD.- Promé minister i formadó, Eugene Rhuggenaath ta konfirmá ku el a nominá Steven Martina serka gobernadó pa hura komo minister. Martina lo asumí un biaha mas e responsabilidat pa e kartera di Desaroyo Ekonómiko.

Fecha tentativo pa e akto di huramentu tuma lugá ta 11 mart awor. Pero kisas e fecha aki kambia atrobe. Tabata deseo di partido MAN, manera EXTRA a informá for di siman pasá pa Martina a bira minister promé ku eligí su persona tambe komo lider polítiko  durante kongreso ekstraordinario di partido 21 mart awor.

Aktual minister di Desaroyo Ekonómiko, Giselle Mc William lo regresá bèk parlamento i Yves “Payo” Schoop lo tuma retiro for di parlamento pa Mc William por tuma asiento bèk den e órgano aki. Esaki konforme e palabrashon original ku a hasi den partido MAN.

Si den práktika lo ehekutá e palabrashon aki tin ku mira ainda. Manera EXTRA a informá tin otro pensamentunan ku ta biba den partido. Sigur serka e frakshon di MAN tin e deseo pa Mc William keda minister mirando e reakshonnan positivo ku e ta hañando riba su trabounan desplegá.

Asta lo tabatin kòmbersashonnan ku otro ministernan di e partido pa wak ki posibilidat tin pa Mc William kambia di kartera.