A informa gruponan konserní pa keda pendiente

WILEMSTAD.-Informashon ku EXTRA ta dispone di dje ta indiká ku un ratu pasá a pone tim di kalamidat na altura ku e derame di petroli lo ta yegando mas serka di kosta nort di Kòrsou. Lesley Fer a konfirmá esei pa EXTRA, pero enfatisando na mes momentu ku no por papia di un situashon di kalamidat. E problema na Kòrsou ta ku no tin muchu hende pa traha den e kasonan aki. P’esei asina ku tin algu ta kuminsá informa e gruponan konserní i ta sigui den komunikashon pendiente di e desaroyonan.

Echo ta ku no por papia di un kalamidat ainda. Pa awor aki ta keda monitor e situashon, No a aktivá e ‘oil spill plan’ tampoko ainda.

Manera EXTRA a informa anteriormente un barku ku ta nabegá den e área di Trinidad & Tobago a kousa un daño enorme na momentu ku petroli a sali for di su tankinan i basha den laman. E petroli aki a yega Boneiru kaba i tabata pendiente kon e situashon lo desaroyá pa loke ta trata Kòrsou.

Minister Cooper ta den eksterior pero a splika ku nan ta siguiendo e desaroyonan hopi djaserka. Wardakosta a anunsiá anteriormente ku awe mainta nan ta bula ku tantu helikòpter komo e avion Dash pa wak e situashon di e derame di petroli den laman.