90% di tur artista, aktivo den e mundu teatral òf di aktuashon na Kòrsou, a uni pa brinda pueblo un Festival di Teatro Kultural-históriko, den e temporada di krísis akí!

Teater ta un bon medio pa brinda konsientisashon kultural-históriko. Den tempu di gloria, añanan 80, un públiko di kasi 38 mil persona tabata gosa di un solo komedia den Centro Pro Arte (Eligio Melfor, Arte ProBa). Aktualmente tin hopi hóben aktivo ku produkshon di videoclip i otro tipo di obra oudio-visual den kua tin aktuashon. Pues APKI ke yuda invertí den un era nobo di teatro, aktuashon i edukashon kultural-históriko na Kòrsou. Asosiashon Promoshon Konsenshi Istóriko (APKI) den kolaborashon ku artistanan teatral i e plantanan lokal TeleCuraçao i TV Direct lo presentá e festival.

Gibi Bacilio representando Asosiashon Promoshon Konsenshi Históriko huntu ku Giovanni Abath ku ta representá e gruponan teatral i tambe komo direktor di esena a duna Djasabra un splikashon di e idea i di e obranan. Ta di tres bia ku ta tuma lugá un festival di teatro históriko ounke e bia aki muchu mas grandi i diferente ya ku e ta bai riba pantaya i alabes e lo ta historia i kultura.

 

Di tres festival

Gibi Bacilio a konta ku na 1988 tabatin e promé festival históriko ku a tuma lugá na luna di mei den Sentro Pro Arte, e di dos a tuma lugá ora a konmemorá 200 aña di lucha pa libertat na 1995. Esei tambe mester a tuma lugá den Sentro Pro Arte, pero debí na entre otro finansa no a logra. A kai riba e idea pa bai Isla Bèrdè, ku a keda kombertí den un anfiteater i a presentá un espektákulo tur afó. Na e momentu ei 250 hende por a presensia e obra. Gibi Bacilio ta konta nos ku tur e dos promé festivalnan tabata puramentu festival di teater históriko APKI ta para pa historia i nan ke pa historia drenta mas serka hende, serka hóben, via skol, programa, hende mester sa nan historia. A usa un teater ku ta un di e medionan di mas fuerte pa informá, forma i eduká i alabes konfrontá hende i den kuadro ei a disidí di bai ku e festival di teater históriko. Den e festival a hinka e lucha pa libertat i Tula pero historia ta muchu mas ku entre otro Chacutu, 30 di mei etc., etc. Asina teater a bira mas grandi na 1995 kaminda tabatin mas grupo ku a partisipá, ku diferente tema di historia di Kòrsou. Awor nos a yega na e di 3 festival ku mester a tuma lugá aña pasá ku 225 aña lucha pa libertat. Pero situashon a disidí otro na momentu ku a keda konfrontá ku e pandemia di COVID. Tur kos a stanka miéntras ku tabatin masha hopi grupo interesá. Papiando ku Rudolf Crispulo komo kordinadó di e festival, nan a bin riba e idea di graba e festival i pone esaki riba pantaya di televishon. Gibi Bacilio di su parti ta gusta teater, kaminda hende ta sinta mira, pa e por wak e ekspreshon den hende su kara. Pero ora a mira e embergadura di e pandemia, a disidí di tòg bai graba. Hopi grupo a haña e idea masha bon mes, un desaroyo nobo i nan ta bai pe.


22 obra

A kuminsá mobilisá e gruponan pasobra algun a kai na kaminda debí na COVID, otro ku problema i finalmente a keda 22 grupo teatral ku lo partisipá den e festival. Ta 90% di e gruponan di arte na Kòrsou ta den e di tres festival. I pa promé bia e festival yama kultural históriko, esaki ta nifiká ku banda di mira historia di Kòrsou i diferente episodio alabes, tin obra tambe ku ta mustra e kultura. Por ta di ántes ku folklor òf esun aktual kiko ta sosodé den nos komunidat. A amplia e konsepto i ta netamente e gruponan tabatin e interes pa kultura tambe i no historia so. Lo tin 22 obra entre 10 pa 30 minüt, i lo abarká tur género ku por imaginá. Lo tin komedia, historia konta, poesia, baila i hopi mas. Ta henter e gama di ekspreshon lo ta den. Tambe lo tin diferente obra ku ta kultura di Kòrsou ta bin dilanti kontando kon nos tabata anda ku otro ántes i kon el a konta òf kon ta anda awor ku otro i tambe diferente episodio di nos historia. Mayoria di e grupo ta konsistí di hóbennan pero tambe lo tin e grupo Ankra na Otro ku Diana Lebacs, Laura Quast, Rina Penso ku tambe lo ta riba pantaya.

Oula na Habaai

TeleCuraçao i Tv Direct a graba i kada un a haña mitar di e obranan pa graba. A graba den oula na Habaai ku tabata un teatro masha gustá ántes. Den e oula ei, ku awor ta manehá pa Teatro Kada Ken, e grabashon a tuma lugá. Gibi Bacilio a bisa ku for di ora drenta e oula bo ta sinti ku ta un teater, e tin tur kos di un teater. E grabashonnan tabata masha interesante segun Bacilio. Ta trata di obranan profeshonal i tantu Tv Direct komo TeleCuraçao a hasi un trabou profeshonal i di mes huntu ku Rigoberth Samson, ku su vishon teknológiko, lus i zonido tabata tremendo kombinashon. Awor tur hende ke mira e resultado. Ta spera ku e lo pasa promé ku novèmber kaba pero sino sper’é pronto, sino ta kuminsamentu di desèmber i si no ta bai kuminsamentu di yanüari 2022. I ora ta papia di historia ta kue for di 4 mil aña promé ku Kristu ku e promé habitante na Kòrsou i bin te awe. Ta un historia i kultura amplio lo keda kontá i presentá Gibi Bacilio a splika.

 

Kasi nos no a partisipá

Giovanni Abath ta direktor di esena di grupo Kara i el a representá e gruponan di teatro splikando Djasabra di e trabou grandi ku a keda hasi pa Rudolph. E ta kòrda kon nan a traha un group chat ku a drei kasi un aña. E festival aki mester a kuminsá aña pasá, pero COVID a kai aden i mester a posponé. Dado momentu tur hende a haña ko’i hasi i a stòp di trein. A keda posponé pa di dos bia, miéntras tin grupo a disidí ku nan no ta bai mas. Giovanni Abath su grupo a tuma desishon ku nan tampoko no ta partisipá mas, pero ta nèt Gibi Bacilio a logra ku nan a kambia di idea. Gibi tabata un preokupá pasobra 2 grupo a disidí di no ta partisipá mas.  El a bisa Djasabra di ta kontentu di a kambia di opinion pasobra tabata un dushi eksperensia ku e festival a bira un grabashon. E manera ku a hink’é den otro, un grupo ta drenta graba, sali i pa otro por drenta pasobra mester a tene kuenta ku kantidat di hende huntu. Kada grupo a haña nan orario i pa kada planta di televishon por hasi nan grabashon. Henter e grabashon  a kana bon i masha bunita. Giovanni a splika ku John Nagtegaal tambe a hunga un ròl importante den e set up i konsehá kon pa hinka e kosnan den otro, kon pa pone tur kos, gruponan tabata drenta sali i grabashonnan a kana un tras di otro.

 

Un oportunidat a presentá

Pa Giovanni festival di teater ta promé bes ku e ta eksperensi’é, siendo e tin kasi 30 aña den teater. (Awor ku grupo Kara). Ta nèt na rant di 95 ku e último festival, Giovanni a kuminsá ku su karera den teater i semper el a tende di tantu festival ku tabatin lokal i internashonal, kaminda nos gruponan por  a presentá pero e nunka a haña e oportunidat ei. I p’esei ku e oportunidat aki p’e tabata algu grandi. I ounke e no a bira un festival kaminda por sinta wak otro grupo i pa tende e aplouso di públiko pa bo sa ku bo ta bon òf esun promé tabata mihó, pero a logra si tin e eksperensia di por ta parti di e 22 gruponan ku te ainda nan tampoko no sa kon e otronan tabata. Nan tambe ta ansioso pa wak e otro gruponan kiko nan lo presentá. Ounke e no a wak, di loke el a tende, loke e por a mira hende ta drenta i sali, el a haña un impreshon ku ta algu grandi. Lo bai tin hopi forma di teater i esei lo hasi e festival aki interesante.

 

Dokumentá

Banda ku nan ta bai televishon ku un públiko mas grandi ainda por eksperensia e obranan, Giovanni a bisa ku festival ta keda dokumentá profeshonalmente. I esei ta algu ku lo ta hopi bon i ku pa añanan lo tin e festival aki komo esun di 3.

 

Peter Stuyvesant

Den kaso di grupo Kara, Giovanni a splika Djasabra ku nan tin un obra ku Rudolph Crispulo a skibi i Giovanni a sintié bon ku e obra. Tabata dos amigu ku a diskutí un ratu riba Peter Stuyvesant, su bon i su malu. I si bo ke ta sinsero e balansa a keda…i dependé kon bo lèn….i tin algun echo, ku esun ku mir’é mes lo saka su konklushon. Si algu ku kisas awe ta normal, aki 100 aña porta ta kastigabel. I p’esei kisas loke Peter Stuyvesant a hasi e tempu ei kisas pa su tempu tabata normal. Pero ta un obra masha bunita i kòrtiku di algu mas ku 10 minüt, i hopi fuerte. I na final mester tuma un desishon ku ta pro òf kontra.

Dediká

E festival ta dediká na dos personahe di nos historia sosial-kultural, esta sr. Angel Salsbach i sr. Eligio Melfor. Tur dos a keda entrevistá i tambe a entregá nan e opheto artístiko komo algu tangibel pa nan tin na nan kas pa nan kòrda. E opheto obra di arte ta trabou di eskultura trahá pa Giovanni Abath kende tambe tin amor pa arte. Algun persona partikular ku ta aktua den e festival ta e.o. sra. Rina Penzo ku a kaba den haña un homenahe pa su trayektoria largu den teater, sr. Steven Croes aktual parlamentario, i e hóben Christopher Leonora, nos último Rei di Tumba hubenil.

 

Algu pa komunidat

Gruponan teatral ke duna komunidat di Kòrsou un ehèmpel di kooperashon i union. Huntu, nan lo presentá total 22 obra kòrtiku, di durashon di entre 10 pa 30 minüt. Tin monólogo, duo, trio, kuarteto, etc, anto e obranan ta hopi variá pa loke ta género. Tin entre otro: drama, komedia, tragedia, tragikomedia, poema teatral, kuenta teatral i musikal. E festival akí ta pinta di bira un tremendo fiesta di aktuashon den kua tur tipo- i forma di teatro ta presente.  Den e tempu akí di tantu reto, artistanan dje mundu di arte dramátiko lokal, ta sinti ku ta un bon momentu pa nan laga sinti un krenchi di nan forsa positivo. Den tempu di krísis, arte ta brinda speransa. E ta bira un refugio, un valf pa yuda saka tenshon, i alabes e brùg ku ta konektá nos na otro!

 

Gruponan ku lo partisipá

E siguiente grupo- i personahenan ku ta den e festival, ta duna un impreshon di variedat teatral-artístiko ku pueblo por spera:Teatro Kada Ken, Grupo Kara, Excel Arts Academy, Grupo Ankrá Na Otro, Albert Schoobaar, Milushka Birge, Giovanni Abath, Jeffrey Tromp,  Shelomi Bakhuis, Rina Penso, Laura Quast, Diana Lebacs, Elodie Heloise, John Nagtegaal, Crisèn Schorea, Jeroen Heuvel, Eric Calmes,

Clay Toppenberg, Katiuska Quinones, Pito Polo, Sheila Payne, Francis Sling, Ojee Jansen, Richailine Elisa, Pachi Damon, Juni Jozef, i tur e demas artistanan ku ta partisipá!

 

Lanta e interes pa ora habri un teater nashonal

Gibi Bacilio ta spera ku e festival aki lo lanta bèk e interes serka gruponan pa presentá mas obra. I alabes pa bati na porta pa Sentro Pro Arte, ki dia e ta keda kla, ki dia un teater nashonal. Esei ta algu segun Bacilio ku mester ban pe. Giovanni Abath tambe ta kere ku mester traha riba e parti ei. pa un teatro nashonal mester kultivá e tera awor aki miéntras ta pensa pa konstruí sino ora kaba ku e teater e ta para te basha abou bek pasobra e públiko pa wak teater ta asina tiki awor aki, ku mester pone kuminsá duna nan kosnan den bario, den skol i gana nan interes pa ora habri e teater nashonal atrobe, tin hende den dje ku por yena salanan i pa e por drei.

LAGA UN KOMENTARIO

Please enter your comment!
Please enter your name here