WILLEMSTAD.- Frente de Trabajadores de America Latina y el Caribe Demócratas Cristianos (FETRAL DC) ta deseá aktual presidente di ABVO, George Hernandez tur klase di éksito den e elekshon di djabièrnè 28 yüni awor. Hernandez a pone su mes re eligibel pa un di dos término komo presidente di ABVO.

Representante di FETRAL DC, Hans Els ta splika ku e organisashon ta un konglomerashon di konfederashonnan di sentralnan sindikal den region ku ABVO tambe ta miembro di dje. Den un karta dirigí na amigunan sindikalista i trahadónan di Kòrsou i Boneiru, FETRAL DC ta bisa ku e ta spera ku e kampaña sólido ku Hernandez a hiba ta di gran satisfakshon i ta spera ku esaki ta hiba na un viktoria pa Hernandez den e elekshon di djabièrnè awor.

FETRAL DC ta sostené kompletamente e vokashon i servisio públiko ku Hernandez a demostrá durante hopi aña. “Nos ta sigur ku Hernandez ta representá e kaminda pa desaroyo sindikal i bienestar di trahadónan di Kòrsou i Boneiru.”

Pa FETRAL DC i trahadónan di henter Latino Amérika e liderazgo di Hernandez ta representá un  posibilidat pa koperashon i desaroyo kompartí. Ta p’esei tin e speransa ku ta reeligí Hernandez pa kontinuá ku e proyekto pa establesé un instituto di formashon sindikal na Kòrsou pa henter e region di Karibe.

Esaki ta hasi posibel pa aktivistanan, militantenan, delegadonan di gremionan i dirigentenan ku ta kompartí e prinsipionan, ideologianan i doktriná di FETRAL pa forma nan mes.

Els ku ta representante di FETRAL DC i e persona di kontakto entre ABVO i e organisashon ta bisa ku ta for di aña pasá ta negoshando ku ABVO pa trese e instituto di formashon di FETRAL DC Kòrsou. Lo establesé esaki na sede di ABVO kaminda e lo fungi komo un skol di sindikalismo pa henter Karibe.

Tin palabrashon ta kana ku Hernandez i FETRAL DC ta di punto di bista ku mester tin kontinuidat pa konsolidá e kombersashonnan ku a hiba, Els ta bisa. Ta pa e motibu aki FETRAL DC ta duna un sosten institushonal sindikal di region pa kandidatura di Hernandez pa presidensia di ABVO, Els ta bisa.