WILLEMSTAD. - Den e siman ku ta kabando aki Korte Superior den kasonan sivil, a dikta sentensia den un kaso remarkabel. Ta trata di un kaso di fia plaka bou di sierto kondishon ku un dado momentu e persona ku tin di paga bèk (debedó) no tabata ke a mantené su mes mas na e kondishon enkuestion. Esaki a kondusí na un proseso hudisial ku finalmente e debedó a pèrdè kaso.

Ta trata di un fiansa di 97.000 florin ku un persona (fiadó) a fia e otro. For di e veredikto ta indiká ku ta trata di dos persona femenino kaminda ku nan a firma komo kondishon di e fiansa ku nan tin sierto relashon ku otro i o amistat. E fiansa a tuma lugá den tur privasidat.

E fiansa mes a tuma lugá for di aña 2018, pero un dado momentu e fiadó a tuma nota ku e kondishonnan  no ta keda kumplí i el a hiba debedó korte i asina eksigí tur e 97.000 florin.

Tabatin un testigu ku a testiguá, pero Korte ta splika ku nan no por saka afó ku debedó no tabata ke niun klase di amistat i o relashon i ku fiadó lo mester a komprondé esaki.

Segun debedó, e fiadó a hasi mal uso di su situashon i a poné firma kos ku e no tabata ke a firma.

E loke ku por dedusí for di e veredikto di kuater página, ta ku e fiansa aki a sali e debedó karu.

Korte ta di opinion ku loke ta firmá ta konta i ta probá ku e debedó a fia 97.000 florin. Sea tin akuerdo mará na e fiansa di amistat o relashon, no ta konta.

Esaki a pone ku korte a konkluí ku e debedor mester paga e suma aki ku tur e interesnan ku ta di 18% pa aña i tambe 3000 florin di gastunan di kobransa mas 10.000 florin di gastu di proseso hudisial.

E debedó lo mester paga bèk riba 100.000 florin.