WILLEMSTAD.- Euphoria Garden ta e tema di e fiesta di fin di aña pa empleadonan públiko. Gobièrnu di Kòrsou ta invitá tur empleado públiko pa un fiesta ku ta tuma lugá 18 desèmber na Capital Ç (“airport dome”). Tur empleado públiko ku ke akudí mester reservá promé ku 2 desèmber.

E fiesta ta kuminsá 7’or di anochi i trahe ta “garden chic/casual”. Banda di e fiesta i pago di debe atrasá na “loontrede” i lumpsum den luna di desèmber, empleadonan públiko ku tur probabilidat lo risibí alabes un bale di 150 florin pa kumpra komestibel kuné. Esaki mirando ku trahadónan igual ta haña 150 florin e aña aki i segun minister di Finansa, Javier Silvania Ministerio di OWCS a manda e sèn kaba pa direktivanan di skol konfeshonal.

Aña pasá kada ministerio a organisá nan propio fiesta kaminda a kibra ku e tradishon ku ta tene un fiesta riba e plenchi di Fòrti i a hür salanan di hotèl. Por ehèmpel Ministerionan di Finansa i Salubridat Públiko na 2023 a tene un selebrashon di fin di aña huntu na Curaçao Marriott Beach Resort. E fiesta aki tabata motibu pa sindikato ABVO den un karta pa minister di Finansa ku e petishon pa duna tur ámtenar ku no ta interesá pa bai fiesta di fin di aña un bale di regalo na balor di 200 florin pa nan por kumpra komestibel kuné.

E 200 florin ta loke ta e gastu pa persona pa organisá e sena i fiesta na fin di 2023. Ministerio di OWCS tambe a pone un fiesta den hotèl miéntras ku Ministerio di Desaroyo Ekonómiko a tene su fiesta tradishonal promé ku tiru. Organisashon di selebrashon di fin di aña tabata dependé di sèn ku kada ministerio tin disponibel riba su presupuesto.

E ministerio ku no tin sèn por a hasi un petishon serka Ministerio di Finansa pa organisá un selebrashon, pero no ta tur personal di tur ministerio ta interesá den fiesta. Tin ministerio pa e motibu aki a preferá di duna trahadónan un pakete di fin aña den forma di komestibel òf un karchi ku sèn ariba pa asina nan tin un tiki espasio finansiero èkstra pa hasi kompranan di fin di aña. E aña aki sinembargo tur kos ta mustra ku ta bai organisá pues un fiesta grandi pa tur empleado públiko i ku en todo kaso personal di enseñansa ta haña un bale di 150 florin.

Parlamento

Manera EXTRA a informá resientemente parlamento di Kòrsou tambe lo ta tur afó ku nan selebrashon fin di aña aki. Invitashon a sali pa tur miembro di parlamento pa un sena di Pasku na Sandals. Sandals ta e resort di mas karu ku tin na Kòrsou i parlamento a skohe pa pone su selebrashon di fin di aña einan.

Ta trata di un asina yamá “dinner party”, pues komementu i fiesta despues. “Bo ta kordialmente invitá na e ‘dinner party’ di Pasku di parlamento. Djòin nos na momento ku nos ta selebrá fin di aña i duna honor na un logro notabel di 150 aña di eksperensia di trabou kombiná bou di miembronan dediká di e tim.”

Asina por lesa riba e invitashon. E selebrashon ta tuma lugá djasabra 21 desèmber i ta dura di 6:30’or te ku 11’or di anochi. Vestuario pa e fiesta aki ta elegante.

E invitashonnan a sali mas ku 1 luna adelantá pa asina tur miembro por tene kuenta ku e tin e fecha reservá. ‘Nos ta spera di por selebrá huntu kubo’, e invitashon ta terminá bisando.