Doñonan no a logra para findishi:

WILLEMSTAD.- Djabièrnè último Korte di Derechonan Sivil, a trata un huisio sumario relámpago ora ku 5 kompania, Liberty, Ensess, Nine Dragon i Eurasia - Private Fundation, kompanianan manehá pa  un “Trust Company”, a bai korte pa para un findishi. Banko Maduro (MCB) a pone tres edifisio di nan na findishi, pa kubri un debe di mas o ménos 4.5 mion florin. E kompanianan aki a entamá e huisio sumario den pitu esta algun ratu promé ku e orario di findishi mester a kuminsá i asina trata di evitá ku e  findishi ta kontinuá.

Despues ku hues a skucha partidonan, ta konkluí ku no tin nada inhustu ku banko ta hasi den afan pa bende e edifisionan.

Na un okashon kaba na luna di aprel di e aña aki, e kompania(nan) a  pidi pa para e findishi, pa posibel refinansiamentu di parti di Banco di Caribe. E echo  ku nada no a sali for di e posibel refinansiamentu, MCB a kontinuá ku nan proseso di findishi i a stipulá fecha pa e findishi dia promé di òktober 10’or di mainta.

Den e kaso spesífiko aki, Korte ta duna di konosé ku no tabatin niun situashon partikular ku MCB no por bai over na un findishi.

Segun e loke a bin dilanti, MCB a hasi tur loke ku ta na nan alkanse pa no bai over na findishi. A trata di yega na areglo di pago, pero ta algun dia promé ku e findishi un pago di 300.000 florin a keda realisá.

Korte ta di opinion ku e 300.000 florin aki ta bin despues di kasi dos aña sin ku niun pago a keda realisá.

E esfuerso aki ya no tin efekto riba un debe grandi ku tin kasi dos aña ketu sin nada ta pasando kuné.

Durante tratamentu a sali na kla ku e kompanianan no a keda kla ku un refinansiamentu i no tin nada den kaminda mas pa para e findishi.

Ku e findishi aki lo tin konsekuensia drástiko ta evidente, pero MCB ta den su derecho pa salvaguardá su interesnan i di e forma aki Korte no a honra e petishon di e kompanianan pa para e findishi.