WILLEMSTAD.-  E hòmber  multi talentoso i alabes un fisioterapista A.D.C.G. (47), mester sinta 1 luna mas den e departamento di Foba na SDKK i despues e mester bai klínika Capriles, máksimo 12 luna pa tratamentu profeshonal relashoná ku su problema sikiátriko.

D.C.G. ta keda akusá pa maltrato di su ruman muhé, destrukshon di bentananan di outo, bentana di porta kas dilanti i tambe portanan di kamber.

Segun e akusashon, dia 16 di mei 2020 e akusado a dal su ruman muhé un òf mas bia ku moketa na su man, barika i kara kual e víktima a sinti basta doló.

Pa ku e di dos echo e ta keda akusá di a kibra muraya di kas, bentana di un kamber, e bentananan dilanti i patras di un outo blanku i tambe bentana di un porta patras, ku  ta pertenesé na su mama di 84 aña.

E akusado tabata den sala di korte pa responsabilisá su mes pa su akto. El a bisa ku e ta atmití di a kometé e echonan menshoná.

Segun e akusado, el a dal su ruman muhé, despues ku su ruman a dal e promé.

Su ruman a bolbe dal e, el a dal e bèk. Despues su ruman a keda bin riba dje i e na su turno a keda splik’é pa keda leu miéntras el a kana bai.

Hues a puntra Arthxir  kiko a pas’é e dia ei.

El a konta ku su pòstnan ta bin na adrès di su mama i e tabata pendiente pa su karchi banko ku mester a yega, pero esei no tabata e kaso.

El a puntra su mama unda su pòst a keda i kier a papia algu, pero segun e akusado kada bes ta kore kuné di un manera hopi agresivo ora e bai kas di su mama i e kos ei tabata kans’e i keda traha kuné.

Esei ta pone ku hopi bia e ta bai bin i kuminsá tira piedra.

Hues a splika ku fo’i 2015 a hasi 2 yamada na polis pa bai e adrès en kuestion pa problema familiar.

Na aña 2016, 2019, 2020 tambe tabatin keho di e famia pa mesun problemanan na polis kontra e akusado.

Dòkter sikiátriko ta bisa ku e akusado tin un defisiensia sikiátriko i ta sufri di  desórden sikiátriko i “schizofrenie”.

E akusado a splika ku e ta un outista i hopi bia a bai klínika Capriles pa tratamentu. Segun e profeshonal, ta konstatá ku e akusado i su famia semper lo hiba un iritashon i posibel eskalashon i por tin ripitishon den e kaso aki, p’esei e ta duna konseho pa e akusado keda den Foba pa e haña remedi.

Tambe e ta proponé pa e sigui haña tratamentu di salú mental i siñ’é kontrolá  su emoshonnan i agreshon.

Segun sikólogo mama i famia ta biba hopi bou di tenshon pa e agreshon di e akusado.

E mama di 84 aña ku tabata den sala a bisa ku e ke pa su yunan ta bon ku otro pa e mira nan den union e añanan ku a sobr’e. El a splika ku Arthxir tin sierto kosnan den su kabes ku no ta bèrdat i ku e no sa mas kon saka nan fo’i dje, debí ku ta e kosnan ei ta pone ku kada bes ta bin problema.

Ademas di esei e mama ke pa e akusado kuminsá paga awor si pa e kosnan ku a ta hasi i a kibra. Mirando esaki e mama a bisa ku e ke 1300 florin di daño perhuisio.

Un primu  di e akusado ku ta esun ku tin derechi d su kuratela, a bisa ku e ta un persona hopi talentoso i tin ku haña tratamentu intermoral.

El a splika ku ora Arthxir no bebe su remedinan, e ta kuminsá kana sushi i drumi riba kaya. E akusado tabata drumi den un outo dilanti kas di su mama.

Polis a konfiská e vehíkulo pa motibu ku e akusado tabata drumi den outo dilanti kas di su mama.

Segun e primu si e haña tratamentu, e por traha bon bon despues.

Fiskal a splika ku e personal di SDKK a duna di konosé den un rapòrt  ku ta bai super bon ku e akusado. E ta bebe su remedinan manera mester ta i ta kumpli ku tur regla, pero na Capriles si ta bai ménos bon ora e ta interná ei nan.

Na total Arthxir a sinta 116 dia.

Fiskal a pidi pa e sinta 2 luna mas i prepará Capriles pe haña tratamentu 12 luna.

Hues den su desishon a konden’é na 1 luna mas den prizòn, despues 12 luna tratamentu na klínika Capriles  i tambe konsulta pa famia.