WILLEMSTAD.- Durante kasonan di infrakshon di tráfiko, un hóben ku ta studiando pa dosente, a presentá den sala di korte pa pidi ku e por paga e but ku el a haña den término.

Segun e prosèsverbal, e ta keda akusá ku dia 9 di mart último e tabata koriendo den  Penstraat 10 or di anochi, ora ku polis a par’é pa un kontròl. A resultá ku e no tabatin seguro ni impuesto válido.

E studiante a bisa ku bèrdat e no tabatin e dokumentonan ei bálido, pa motibu ku el a kaba di kumpra e outo i no tabatin mas sèn pa kumpra seguro.

El a opta pa bai fia sèn pa por kumpra seguro. Aparte di ta bai skol, e ta kue djòp ratu ratu.

P’esei el a bin korte pa wak ku e por paga e but den término. Fiskal Girigorie a bisa durante su rekisitorio ku e ta haña hopi bon di e studiante su parti kon el a bin korte di su mes i pidi chèns pa e por paga e but tiki tiki.

Fiskal a haña e akusashon probá i a  hasi demanda di 400 florin di kual 200 kondishonal ku un periodo di prueba di 2 aña.

Hues Snitker den su desishon a bai kompletamente di akuerdo ku e demanda di fiskal.