W’STAD/ROTTERDAM.- Un demanda di 23 aña di prisòn ta loke ku fiskal a pidi den korte na Rotterdam pa e hòmber yu Kòrsou Julien M.(48) ku a asesiná su eks partner. E eks partner ta Marianella “Maria” Seintje (43). E echo a tuma lugá 26 di desèmber 2022. Fiskal a bisa ku ta trata aki di un asesinato ku ta karga e nòmber “femesidio” ta loke a sosodé. Pasobra e asesinato ta kuadra den vários kaso di violensia kontra di hende muhé, kaminda hopi biaha eks partner di e hòmber ta bira e víktima. Algun dia promé ku e asesinato, e dama víktima a kaba di bai kas, despues di tabata den e instansia “Blijf-van-mijn-lijf-huis”.
Maria Seintje kende tabata huntu ku su dos yunan muhé di 5 i 8 aña, a keda asesiná den e kas ku ta keda na Treek den Vreewijk, na Rotterdam-Zuid.
E dama víktima tabata den un sentro pa hende muhé debí ku e tabata bou di menasa di morto di parti Julien. Miembronan di famia a atvertí e dama víktima di e hòmber Julien M., pero e ta keda bai bèk serka e hòmber. Segun e miembronan di famia, e hòmber tabata kontrolá e dama. I dor di esaki e no por a buska yudansa. Di otro banda famianan ta bisa ku e yunan di 5 i 8 aña a mira tur loke a pasa. E yu muhé di 8 aña a yama su wela ku a mèldu outoridatnan polisial. Tabatin sospecho ku Julien lo a tira e dama dilanti di su yunan, pasobra a tende gritu di e muchanan pero tambe tin otro deklarashon ku e lo a duna e muchanan kos di bebe. Sinembargo a sali na kla ku el a sera e muchanan den kamber i a bisa nan pa no sali. Ta su siguiente dia ora e muchanan no a tende moveshon den kas, a sali for di kamber i a bai den kamber di e mama i a hañ’é morto. Despues di e akto kruel aki, e hòmber a bandoná e kas di e víktima den outo di su primu ku a bai busk’é. No a dura hopi despues dje kaso asesinato ku outoridatnan a detené Julien i un otro hòmber di 52 aña na Jufferkade, Rotterdam. Polisnan a haña un arma di kandela den kas na Jufferkade, i esaki a keda konfiská.