WILLEMSTAD.- Na yanüari último korte di promé instansia a kuminsá ku tratamentu di un kaso, kaminda doño di outo ta eksigí pa haña su vehíkulo bek, despues ku polis a konfisk’é.
Ta trata di e dama di fam M. ku a bin dilanti hues i bisa ku e ta doño di e outo marka Audi ku polis a konfiská despues ku su pareha E. Clemencia a lòs un kantidat di bala riba e vehíkulo, durante un problema ku a surgi entre nan.
Clemencia ta será akusá di a provoká un kaso di dòbel asesinato, ku a tuma lugá na Weto dia 7 di aprel 2019. Su kaso ainda no a wòrdu tratá integralmente.
Fiskal Jansen a bisa ku mester hasi algun investigashon promé, relashoná ku e outo.
Segun fiskal e outo ta riba nòmber di e dama, pero kisas ta Clemencia a kumpr’é i si ta asina mester kuminsá ku un investigashon di labamentu plaka kontra Clemencia.
Ministerio Públiko ta sospechá ku e outo ta prosedente di ganashinan di kriminalidat.
Segun fiskal Clemencia den un deklarashon anterior a bisa ku el a tira riba e outo pa motibu ku e a kumpr’é i niun hende tin nada di bis’é.
Resientemente Ministerio Públiko a laga trese Clemencia dilanti hues pa e kaso aki. E bia aki el a bisa ku e outo ta di e dama i ta su wela a yud’é kumpr’é.
Segun Clemencia, e no sa kon el a yega na dje ni kiko el a paga pa e outo. El a splika hues ku e tabata fia e outo tin bia, pero e outo no ta di dje.
Fiskal Jansen a bisa despues ku el a hasi investigashon i a resultá ku a hasi un fayo i no a pone “beslag” ainda riba e outo i awor nan no por hañ’é. Aparentemente e vehíkulo a wòrdu bend’é, pero e ta blòkiá i esun ku a kumpr’é no por pas’é riba su nòmber.
Fiskal a bisa ku ta hasiendo investigashon pa sa unda e outo ta, pa pone beslag riba dje.
Mirando esaki e kaso a keda posponé pa kaba hasi algun investigashon.