WILLEMSTAD.- E kaso di Steven Martina no por ser kompará ku esun di Marilyn Alcala-Wallé. Nan ta diferente for di otro. Ademas Ministerio Públiko no ta apresiá ku ta tild’é di ta  koperá ku weganan polítiko. Asina fiskal mr. H. Oppe a trese dilanti ayera mainta durante su rekisitorio den e kaso penal entamá kontra e èks minister sra. Marilyn Alcala-Walle. Na final di su intervenshon mr. Oppe a hasi un demanda di 150 ora di trabou boluntario, 3 luna di kastigu kondishon i 2 aña di prueba. T’asina ku sra. Alcala-Wallé ta ser akusá di a violá e lei di integridat i tambe di falsifikashon di dokumento na momentu òf despues ku el a bira minister den gabinete Rhuggenaath.

Un dje stipulashonnan den e lei menshoná ta ku e persona ku ta kandidato pa bira minister lo mester distansiá su mes di aktividatnan pagá òf no pagá pa evitá ku lo por tin konflikto di interes. Alcala-Wallé tabata miembro di direktiva di Road Runners Club, presidente di Fundashon Marilyn Alcala-Wallé i direktor di un kompania di su kasá.

Segun fiskal mr. Oppe, e akusado no a distansiá su mes ofisialmente di e aktividatnan mesora pa via di karta ni na Kámara di Komersio, sino te despues ku e asuntu aki a bira un ‘issue’ den prensa i den e mundu polítiko. Tabatin eksistensia di 4 kuenta bankario ku e no a hasi menshon di dje manera debe ser pa asina por a haña un impreshon di su situashon finansiero.

Lei ta eksigí ku e mester a distansiá kompletamente i ofisialmente for di tur aktividat. E fundashon ku ta karga su nòmber no a ser likidá, pasobra el a keda eksistí tòg. E mester a likidá esaki kompletamente. Segun fiskal, e tin komprenshon ku Alcala-Wallé lo a hasi hopi kos bon via di su fundashon pa studiantenan i pa Road Runners Club. Pero den e mesun rosea e mester a realisá ku lo por surgi konflikto di interes ora ku e ta sintá despues komo minister. Por ehèmpel, si a drenta un petishon pa supsidiá e klup di kaminata menshoná, kiko e lo a hasi?

Dor ku el a keda sin informá di e aktividatnan ei, e formador dje tempu ei no tabata sa tampoko di nan. E no mester a asumí nada, sino yena e formulario manera debe ser, i awe e lo no tabata den problema.

Kaso Steven Martina:

Durante tratamentu di e kaso aki a hasi un komparashon djesaki ku esun di Steven Martina. Pero segun e representante di Ministerio Públiko, di ningun forma por kompará nan ku otro pa motibu ku den e kaso di Martina tabatin denunsia kontra dje pa su posibel partisipashon den toma di desishon riba algu ku a regardá un kompania (Guardian) den kual e tabata akshonista.

A seponé e kaso aki komo ku no tabatin prueba ku el a hasi nada robes. Ademas Martina a distansiá su mes kaba for di su akshonnan.

Mas aleu durante e kaso un dje abogadonan dje trio ku a defendé Alcala-Wallé lo a insinuá ku Ministerio Públiko lo ta koperá den weganan polítiko. Mr. Oppen no a apresiá e remarke aki bisando ademas ku no ta OM a obligá Alcala-Wallé pa baha sino ku ta a base di e denunsia. Es mas, miéntras ku no hasi un kambio den e lei di integridat (screening) lo sigui traha ku e loke tin aktualmente riba mesa.

Teniendo kuenta ku tur aspekto den e kaso aki fiskal mr. Oppen a hasi un demanda di 150 ora di trabou pa komunidat (ekivalente na 75 dia di prizòn), 3 luna kondishonal i 2 aña di prueba.

Mr. Edelenbos lo dikta sentensia den e kaso aki dia 12 di mart pa 13.30or.