WILLEMSTAD.-Ministerio Públiko a apelá sentensianan di libertat i tambe e kastigunan abou, den kaso “Bari”.
Den e kaso aki tabatin un kantidat di 10 persona di nashonalidat venezolano, akusá di a kometé e echo horendo aki.
Ministerio Públiko a akusá nan di tabata envolví den desaparishon i asesinato di e komersiante, Angel Barios Rodriguez.
Angel Barios Rodriguez a keda derá bibu, despues di un intento pa kita plaka for di dje, ku despues a resultá di tabata apénas 1000 florin ku e tabatin riba su kuenta.
E hòmbernan a sekuestr’é i bai hib’é na un kunuku na Choloma, pa kita sèn for di dje i despues tir’é den un buraku ku nan a mes a koba ku un katapila.
Kasi tur e akusadonan a ninga e akusashonnan i a bisa ku nan no tabata sa e plan di Ordoñez, ku ta esun ku tabata traha p’e víktima i a bin ku e plan.
E akusado na promé instante no kier a papia nada, pero despues a basha abou riba tur e otronan ku a kondusí na nan detenshon.
Ordoñez tabata debe e víktima 13 mil florin mas o ménos.
E tabata sa su kódigo di banko i p’esei kier a deshasí di dje. Na e sitio nan a logra wak e kuenta di e víktima i a mira ku ta solamente 1000 florin e tabatin.
Esei a pone ku algun di e hòmbernan a bira furioso i a bisa ku mester mata e víktima, paso el a mira nan tur su kara.
Ordoñez mes a bai mustra polis unda e kurpa tabata derá i a duna detaye amplio kon tur kos a bai.
Korte a tene kuenta ku esaki den e veredikto i a baha e demanda di kastigu di Ordoñez.
Hues den su veredikto a sentensiá J. Mendez na 3 aña di prizòn; L. Ordoñez Zavala a keda sentensiá na libertat pa su envolvimentu den e kaso; O. Casares Palencia a keda sentensiá na 9 aña di prizòn; O. de la Rosa a haña libertat inmediato; P. Rodriguez Polo a keda sentensiá na 9 aña; Y. Trujillo Vargas sentensiá na 1 luna di prizòn pa labamentu di plaka; J. Colina Cobis sentensiá na 10 aña di prizòn; J. Ramon Polo Mendez na 5 aña di prizòn, G. Ordoñez sentensiá na 22 aña i M. Loaiza Ordoñez sentensiá na no ménos ku 16 aña di prizòn despues ku Ministerio Públiko a pidi 18 aña p’e durante e kaso.
E echo ku el a mira un redukshon den esaki ta pasobra el a koperá ku hustisia.
Hues a bisa ku si no tabata pa su koperashon, hamas lo a deskubrí e kurpa sin bida te pa detené e demas akusadonan.
E sentensianan no a kai den bon tera pa fiskal mirando e gravedat di e kaso i p’esei a apelá.