WILLEMSTAD.- Resientemente korte di promé instansia a posponé tratamentu di e kaso kontra di e akusado D. Rosina (27) pa motibu ku hues ku mester a trata e kaso, ta den karentena. Rosina su detenshon a keda di “skors” algun luna pasá, despues ku e hues ku a trata e kaso den pro forma, a bai di akuerdo ku su abogado mr Athena Sulvaran, ku no tin motibunan grave pa tene e akusado será.
Rosina ta keda akusá di a laga e hòmber J.Goeloe (34) eksportá 13 kilo mas 890 gram di koka den un maleta dia 27 di sèptèmber 2019 pa Sint Maarten.
Goeloe a keda kondená na 3 aña di kual 1 kondishonal.
Durante tratamentu di su kaso, el a deklará ku ta Rosina a dun’é maleta ku droga.
El a bisa di a bin Kòrsou ku fakansi i Rosina a ofresé pa hiba sèn p’e Sint Maarten a kambio di 4 mil dòler.
Segun Goeloe, nunka Rosina a papia kuné tokante di droga.
Ora ku e tabata na aeropuerto, el a mira ku Rosina tambe tabata riba mesun vuelo kuné.
Segun Goeloe ta ora ku duana a detené, el a mira ku den e maleta tabatin droga en bes di plaka manera a palabrá.
Fiskal a remarká ku na polis Goeloe no a deklará nada di esei den komienso.
Dia ku e kaso a keda presentá el a disidí di basha bou.
El a trese kopia pasport di Rosina indikando ku ta e a dun’é e maleta di droga.
Goeloe a bisa ku e tabata hopi rabiá pa e loke Rosina a hasi kuné paso e intenshon no tabata pa eksportá droga.
Mirando esaki, Rosina a keda detené pero a keda insistí ku e no sa nada di droga.
Den un di e kasonan ku a keda presentá, fiskal a bisa ku Rosina a topa mama di Goeloe na Sint Maarten i bis’é pa e no wòri ku nada, paso e lo sòru pa su yu.
Segun fiskal, dor di miedu i represaya e mama no kier a deklará. Despues ku fiskal a pidi pa posponé e kaso pa skucha testigu, abogado Athena Sulvaran a bisa ku no ta hustu pa su kliente keda warda te ora kaso bolbe bin dilanti, siendo ku no tin prueba konkreto kontra su kliente.
Segun e abogado e loke e mama di Goeloe a deklará kontra su kliente, no ta motibu pa inkrimin’é. El a bisa ku Rosina a pidi fo’i febrüari pa skucha dos testigu pero e dia ei despues di basta luna, no a sosodé. Anteriormente dor di e krísis di COVID, a sera konekshon aéreo ku Sint Maarten i a pone ku no por a bula bai skucha e testigunan.
Segun e abogado úniko kos ku tin Rosina será ta e palabra di Goeloe kontra di su kliente.
Hues Snitker den su desishon, a duna e abogado rason i a bisa ku e tampoko no ta mira motibu pa wanta e akusado mas será i a “ skors” su detenshon. Resientemente e kaso no por a keda trata debí ku e hues ku ya tabatin tur kos prepará pa trata e kaso, ta den karentena i a trata e kaso den pro forma via konferensia di video. E akusado a pidi pa e haña su pasport bek pa e bai buska su yu di 14 aña fo’i Hulanda, pa bin pasa dianan di fiesta na Kòrsou, pero fiskal Niks a pidi hues pa rechasá e petishon, debí na e rísiko di huida. E akusado por bai i keda sin presentá pa tratamentu di su kaso. Fiskal a splika ku e akusado kasi tur fin di siman tabata biaha pa vários isla i tambe Hulanda i p’esei ta rísiko entreg’é su pasport pa evitá huida. E kaso a keda posponé pa dia 11 di yanüari binidero.