WILLEMSTAD.- Fiskal Bart ayera a opta pa manda e kaso bèk hues komisario, despues di a pidi ayudo di NFI (Nederlands Forensisch instituut) na Hulanda, pa hasi investigashon riba e oudio di e tiroteo, ku a resultá den asesinato na Brievengat.
Ta trata di e kaso di asesinato “Sentebibu”, ku a tuma lugá dia 16 di sèptèmber 2020, na altura di Toko Win/ Tuki Snèk.
Riba e dia en kuestion, Ruchairo Richenielo “Chay” Emerenciana, nasé na Kòrsou, 20 sèptèmber 2000 a keda likidá.
E akusadonan I. Deonicio (22) i G. Thomasita (21) ta keda akusá di a tira e víktima. Deonisio a bisa di a aktua den defensa propio, despues ku Emerenciana a kuminsá tira riba nan promé.
E kaso ta dal otro buèlta despues ku a tuma nota di un “voice” ku a bai rònt kaminda por a skucha e tiroteo.
Den promé instante, por a skucha 5 tiru, pa despues un pouze di un frakshon di algun sekònde i despues ta bolbe skucha 7 tiru mas.
Deonisio ta insistí ku e promé 5 tirunan tabata di Emerenciana ku a kuminsá tira promé, miéntras fiskal ta bisa ku tin tur indikashon ku ta un arma a wòrdu usá. Mirando e diskrepansia den e kaso aki, fiskal a bisa ku e ta bai pidi ayudo di NFI, pa wak si nan por hasi un investigashon, pa yuda saka afó si ta bèrdat Emerenciana kisas ta esun ku a tira promé manera Deonisio i Thomasita ta bisa.
Hues a puntra Deonisio unda e arma ku el a usa e dia ei ta, e akusado a kontestá ku el a benta e arma afó.
Hues a duna di konosé ku frei di Deonisio a deklará, ku el a mir’é bai pafó ku e arma, despues di e suseso el entregá un hende ku a bin den un outo pretu, paso el a bin paden sin dje.
Deonisio na su turno, a keda para riba ku e no sa unda e arma ta.
Hues a bis’é ku e arma por yuda hasi investigashon riba e outo ku nan tabata aden, mirando ku aparentemente e outo a haña bala ora Emerenciana a kuminsá tira riba nan.
Tambe pa kompará e arma ku e hulsnan ku a keda bentá abou na e sitio di e suseso.
Testigunan a deklará ku nan a mira Deonisio ku un arma lachi largu, miéntras Deonisio ta bisa ku e tabatin un ‘glock’.
Segun abogado Prevo ku ta hiba defensa pa Deonisio, tabatin un hòmber pará banda di e outo ku a mira tur kos i ku e ke pa e wòrdu skuchá.
Fiskal ta di opinion, ku tin tur indikashon ku ta un arma so a wòrdu usá den e kaso aki, p’esei e ta haña ku mester sigui ku e investigashon i manda e oudio pa NFI.
Hues a bisa ku si NFI no por duna un splikashon, e ke pa nan pone e motibu riba papel.
Mas aleu hues a duna di konosé ku ta importante pa sa dikon “Chay” a keda asesiná.
Tambe e ke pa polis bisa klaramente kua zonido di bala i e tipo di arma ku nan ta skucha.
Mirando tur esakinan e kaso a keda posponé i lo kontinuá dia 22 di òktober binidero.